Wanneer die lewe probeer om jou te oorweldigVoorbeeld

DIT IS DIE MOEITE WERD! 

Hoe beter jy God ken, hoe meer kan jy die ideale lewe lei, al die voordele ontvang en die oorwinning behaal wanneer jy oorweldig voel. Dit neem inspanning om Hom te leer ken — om sy Woord te lees, om tyd aan gebed te wy, om 'n lewe van gehoorsaamheid te leef — maar dit is die moeite werd!  

Ek het onlangs 'n getuienis van 'n vrou ontvang wie se man aan Parkinson se siekte gely het. Sy het my 'n paar weke tevore gevra om vir hom te bid. Hier is 'n uittreksel van wat sy vir my gestuur het: 

Ek weet nie hoe om genoeg dankie te sê nie. Ek het jou onlangs gevra om vir my man, wat Parkinson se siekte het, te bid. Sy liggaamlike stryd het van daardie dag af aansienlik verbeter. In plaas daarvan om lusteloos en depressief te wees, het hy al hoe meer soos sy "ou self" begin optree — energiek, hy neem weer deel aan kerklike aktiwiteite, hy maak weer tuin en doen dinge buite — hy leef 'n beter, gelukkiger lewe. Dit lyk asof sy medikasie ook beter werk. "Wonderwerk" klink nie na 'n sterk genoeg woord nie. Ek kan net nie genoeg vir jou dankie sê vir jou gebede nie.

Terwyl ek hierdie kosbare vrou se nota lees, het ek gedink: "Wat 'n voordeel is dit om God te ken!" Hierdie man is waarskynlik meegedeel dat daar weinig hoop vir hom op mediese gebied is — maar kyk wat het God gedoen! Ek was iemand ver weg wat nie regtig die man of sy vrou geken het nie, maar toe ek saam met hulle (en waarskynlik ander) gebid het, het die Here gehoor en ons geantwoord!

Wanneer ons Hom ken, kan ons Hom ken as Geneesheer, Voorsiener, Vertrooster, Oorwinnaar en Vriend. Ons is nie soos diegene sonder Christus, sonder hoop en hulp nie (Efesiërs 2:12). Ons kan verwag dat ons Vader se liefde en genesende krag die moeilikhede en probleme sal oorkom wat probeer om ons te oorweldig. 

Om naby aan God te leef, gee jou 'n voordeel in elke sfeer van die lewe. Ja, dit neem geestelike moeite om tyd in sy teenwoordigheid deur te bring, om versoekings teen te staan, om 'n lewe te lei wat God behaag, en sommige mense mag dink dat die opoffering om ons lewe af te lê om meer van Hom te ontvang, te veel gevra is (Markus 8:34, 35). Maar dit is nie! Die Bybel sê dit is redelik, en afgesien daarvan, is die beloning soveel groter as enige opoffering wat ons ooit moet maak. Dit is die moeite werd! 

Het hierdie leesplan jou gehelp? Dit is 'n uittreksel uit my boek “Closer Than You Ever Imagined: Experiencing the Deep Relationship With God You Always Wanted.” Jy kan die eerste gedeelte hier lees.