Pan fydd Ffydd yn Methu: 10 Diwrnod o ddod o Hyd i Dduw yng Nghysgod AmheuaethSampl

Yn Exodus, pan ddwedodd Duw wrth Moses am dynnu ei sandalau, roedd am ei fod yn sefyll ar dir cysegredig. Mae'n rhaid bod hynny wedi ei synnu! Roedd yn adnabod y rhan honno o'r anialwch yn dda. Roedd wedi cerdded arno am ddeugain mlynedd fel bugail. I Moses, dyna ble roedd yn gweithio. Nid oedd yn ei feddwl yn ddim byd mwy na thir cyffredin, llychlyd, budr, wedi ei sathru gan ddefaid. Ond dwedodd Duw ei fod yn gysegredig.

Beth os yw’r tir rwyt arno nawr wedi ei socian gyda sancteiddrwydd? Beth os yw holl fanylion dy fywyd yn cael eu treiddio gan silwét Duw? Beth os yw'r awyrgylch o'th gwmpas yn cael ei drwytho gan ei lais?

Mae Duw’n siarad, ond falle ddim yn union yn y ffordd rwyt ti’n disgwyl.

• Mae e’n siarad drwy bobl eraill. Hyd yn oed y rhai sy’n dy gythruddo.

• Mae e’n siarad drwy’r celfyddydau, llyfrau da, cerddoriaeth, barddoniaeth, caneuon a ffotograffau.

• Mae’n gallu siarad drwy freuddwydion. . . .

• Mae e’n siarad drwy’r greadigaeth, wrth i ni syfrdanu ar harddwch ei greadigaeth.

• Mae'n siarad trwy argyhoeddiad a'r synnwyr miniog sy’n gwybod fod rhywbeth o'i le. (Weithiau nid distawrwydd Duw yw’r broblem ond sŵn byddarol pechod. Mae pechod eisiau bod y llais uchaf yn ein bywyd. Paid â gadael iddo fod.)

• Mae e’n siarad drwy ein poen.

• Mae e’n siarad yn ein colled.

• Mae e’n siarad hyd yn oed yn ein hamheuaeth.

Os yw Duw’n bodoli, yna does yna ddim y fath beth â thir cyffredin. Mae’r cwbl yn gysegredig. Y foment hon, nawr, mae ble bynnag wyt ti yn gysegredig. Mae Duw’n dy wahodd i dynnu dy sandalau a thrwytho dy hun mewn addoliad.

Mae e yma.

Mae ôl bysedd Duw dros dy fywyd cyfan.