Ses Dae van die Name van GodVoorbeeld

DAG 3: JEHOVAH JIREH – DIE HERE SAL VOORSIEN 

Jy is onseker oor hoe jy hierdie maand jou rekeninge gaan betaal. Die toestand van jou verhouding hang in die lug. Jy het gehoor dat besnoeiings by die werk kom, en jou posisie by die maatskappy is onseker. Wanneer die noodsaaklikhede van die lewe op die spel is — gesondheid, finansies, skuiling, kos, gesin, werk — is dit natuurlik om beangs te voel asof jy nêrens het om heen te draai nie. Dit is wanneer jy moet aanklop by Jehovah Jireh. Hierdie geseënde naam van God beteken "die Here sal voorsien," en dit is 'n Naam gevul met krag en mag.

Wanneer ons bang voel oor ons toekoms, is dit lewensbelangrik dat ons na God draai en sy Naam aanroep. Elke goeie en volmaakte geskenk kom van Hom, en daar is geen beperking op die gawes en seëninge wat Hy voorsien nie. Om ons geloof in Hom te plaas kan soms die enigste manier wees om ons vrese stil te maak en 'n positiewe ingesteldheid te handhaaf.

Dit kan 'n moeilike les wees om te leer, maar beproewinge hier op aarde versterk ons geestelike spiere en trek ons nader aan God. Deur ons worstelinge wys Hy ons eerstehands hoe Hy lug voorsien vir ons longe om asem te haal en lig vir ons oë om te sien. Hy gee vir ons presies wat ons nodig het om die grootste groei in ons te produseer, en die mees verreikende impak in sy koninkryk te hê. En Hy gee dit altyd met 'n gees van liefde.