Vreugde In Alle TydperkeVoorbeeld

Wag. Wie hou daarvan om te wag?



Dit wil voorkom asof ek al my hele lewe lank vir iets gewag het … of gewag het dat God namens my sou beweeg! Hoeveel gewone dae het verbygesleep toe my hart en gedagtes op môre ingestel was?



Die waarheid is: ons gaan almal deur wagperiodes! Dit is ook my persoonlike keuse of ek dan geduldig of ongeduldig sal wag!



Weier om in jou wagperiode bekommerd te wees. Kommer is 'n mors van tyd, energie en emosies. Kommer is berug daarvoor om 'n groot aantal van ons "vandag" te vernietig. Die definisie van gebed is nie "kommer op my knieë" nie.



Moenie negatief wees in jou wagperiode nie. Gooi negatiwiteit soos gister se vullis weg terwyl jy wag.



Moenie in jou wagperiode bitter word nie. Moenie verkeerdelik aanneem dat niks ooit vir jou sal verander nie. Bitterheid verander altyd in selfsugtige woede. Woede sal 'n vrugbare lewe in 'n vrugtelose lewe verander.



Moenie kerm en kla terwyl jy in jou wagperiode is nie. Niemand wil na jou verbale braaksel luister nie; en niemand stel belang in jou ongeduldige kieme nie.



Belê eerder in produktiewe en gesonde aktiwiteite terwyl jy wag! Sluit as vrywilliger by 'n hawelose skuiling aan. Pas 'n jong gesin se baba op. Neem 'n bejaarde paartjie uit vir middagete. Gaan op sendingreise. Nooi mense uit vir ete en 'n speletjies-aand.



Bid vir iemand anders terwyl jy wag dat jou gebede verhoor word! Maak 'n lys van ander wat jou gebede nodig het en bid dan elke dag vir hulle. Miskien kan jy selfs daardie mense laat weet dat jy vir hulle bid. Skryf notas van bemoediging neer en stuur dit met Skrifgedeeltes aan hulle.



Praat die taal van hoop! Hoop moet die moedertaal wees van iemand wat wag. Leer om dit te praat net soos jy 'n nuwe taal sou aanleer voordat jy 'n vreemde land besoek. Die enigste taal wat in die lewe se wagkamer gepraat moet word, is die taal van hoop.



Aanbid jou pad deur die wagperiode! Sing jouself aan die slaap en fluit terwyl jy werk. Neurie terwyl jy bid en hou 'n simfonie van opregte vreugde byderhand terwyl jy wag dat God sy werk namens jou sal voltooi. Die lied van jou hart moet op sy hardste wees wanneer jy jou in die wagkamer van die lewe bevind.



Vreugdevolle Gedagte om te Oordink: Wat beteken dit om "geduldig te wag"?