Wanneer Teleurstelling ToeslaanVoorbeeld

Aanvaarding Van Jou Teleurstelling 

Ons is lief daarvoor om geskenke of komplimente te aanvaar, maar wie wil nou ooit teleurstelling aanvaar? Soms voel dit vir ons beter om in sak en as in ons teleurstelling te sit, eerder as om dit te hanteer en aan te beweeg. Deur op daardie plek te bly, laat dit ons op die een of ander manier toe om vas te klou aan dit wat ons nie gekry het nie en selfs te dagdroom oor wat "kon gewees het." Ons kan nie voortgaan om in selfbejammering te sit as ons wil aanbeweeg van dit wat ons so moedeloos en teleurgesteld laat voel het nie.

Deur ons teleurstelling te aanvaar beteken nie dat ons dit wat ons teleurgestel het goedpraat of goedkeur nie. Dit beteken eenvoudig net dat ons erken dat dit gebeur het en nie voorgee dat dit nie gebeur het nie. Deur hierdie standpunt in te neem, is ons op die pad om ware bevryding te vind van dit wat ons vreugde steel. Kom ons doen dus twee dinge om ons te help om teleurstelling te aanvaar.

Erken Dit

Teleurstelling is 'n soort hartseer wat voorkom wanneer ons hoop en begeertes onvervuld bly. Ja, selfs volgelinge van Jesus ervaar teleurstelling. Nogtans beteken dit nie dat ons onvolwasse Christene is nie. Dit beteken nie dat ons nie ons hoop op Jesus stel nie en dit beteken beslis nie dat ons oppervlakkig is nie. Dit beteken slegs dat ons gehoop het op 'n ander resultaat as wat ons gekry het. Wat het in jou lewe gebeur? Het daar 'n situasie opgeduik wat jy nie verwag het nie? Het iemand se woorde jou so gewond dat jy dit nie kan vergeet nie? Het 'n droom oor en oor gesterf en jy weet nie hoe om weer te begin nie? Skryf dit neer, sodra jy jou teleurstelling erken het. 

Rou Daaroor

Wanneer jy dit neergeskryf het, ervaar dan die verlies daarvan. Jy het hoop, vreugde en geluk uit 'n bepaalde uitkoms begeer, maar dit nie gekry nie. Dit is teleurstellend. Om verlies te betreur is die deel waarvan min mense hou. Die meeste mense sou eerder verkies om hulle pyn te ignoreer en "met hulle lewens aan te gaan." Ons moet vasbyt en rou oor die gevoelens wat gepaardgaan met dit wat ons as 'n terugslag beskou het. Ons moet egter versigtig wees om nie toe te laat dat rou ons na wanhoop toe lei nie. Rou is 'n proses en het verskillende stadiums. Gedurende hierdie stadiums maak ons vordering in ons genesing, al kan ons steeds deur die herinnering van ons teleurstelling verblind wees. Moenie bekommerd wees nie — om moed te hou in jou routyd is steeds belangrik en sal ons help om by die plek uit te kom waar hoop leef. 

Die verhaal van Job in die Ou Testament is vol verwoestende hartseer en uiterste teleurstelling. Job het letterlik alles verloor, behalwe sy vrou en sy eie lewe. Hy het probeer om sin te maak van die verlies van sy kinders en sy lewensmiddele, maar sy hartseer was meer as wat hy kon hanteer. Tog het hy aangehou om God te aanbid en nie in sy pyn gesondig nie.

Wat jy ook al ervaar, ongeag hoe vreeslik erg jou teleurstelling is, God kan jou hartseer, jou vrae en die woede in jou teleurstelling hanteer. Hy wil dit eintlik hanteer. Wie God is en waaroor Hy beskik, is wat jy in jou tydperk van teleurstelling nodig het.