StormbestandVoorbeeld

Daar is tye in die lewe wanneer omstandighede van uiters moeilik na ondraagbaar verander. Dit was so in Paulus se geval in die middel van die Middellandse see. 

Daar sal geleenthede wees wanneer jy nie in staat sal wees om die gebeure wat in jou lewe woed te beheer nie. Tydens daardie oomblikke, as jy baie bang is en na enige strooihalm gryp, onthou dat jy 'n Anker het. 

Jou sekuriteit lê in 'n verhouding met Jesus Christus. Wanneer die soutwater van omstandighede jou naar maak en wanneer die wêreld om jou dreigend en veranderlik is, vind jou Anker en laat Hy jou vashou in die onbeheerbare waters van jou lewe. 

Te midde van die hewige storm wat Paulus en sy mede-reisigers ervaar het, "het hulle die volgende dag die skip se vrag oorboord begin gooi" (Handelinge 27:18). Toe daardie besluit nie die vrag ligter genoeg gemaak het nie, "het hulle eiehandig ook die skip se toerusting in die see gegooi" (vers 19). 

Die desperate bemanning het nie 'n ander keuse gehad as om al die onnodige vrag oorboord te gooi nie. Dit was nodig om hulle skip en lewens te red. Watter veranderinge moet jy aanbring sodat jy die rotsagtige kuslyn kan vermy waarheen jy geslinger word en ongedeerd uit die storm kan kom? Wat moet jy dalk uit jou lewe verwyder? 

Paulus, wat so baie verdra het ter wille van die evangelie van Jesus Christus, het vir hierdie bang en deurweekte mense gesê: "Hou moed!" Paulus het nie in die storm bedreig of bang gevoel nie, want hy was meer bewus van die krag van God as van sy eie swakhede.

Waar vind 'n mens moed as die wind huil en jy byna niks sien nie? Waar kom moed vandaan as 'n gewone man of vrou in die middel van 'n reënstorm van teleurstelling of 'n stortvloed van wanhoop is? Waar is moed op daardie oomblik? 

In Paulus se woorde is daar 'n frase van vier woorde verskuil wat die sleutel is vir 'n moedige lewe: "Ek vertrou op God ..." (vers 25). 

Ons is kinders van die koning van die eeue en Hy het ons sy Heilige Gees gegee sodat ons kan kies om dapper te wees, selfs in die hewigste storm of die warmste vuur.