RIGTERS 5:1-5,18-22,31
RIGTERS 5:1-5 Bybel vir almal (ABA)
Daardie dag het Debora en Barak seun van Abinoam hierdie lied gesing: “Manne in die land Israel het gereedgemaak vir die oorlog. Niemand het gesê dat hulle moet kom nie, hulle het self gekom. Prys die Here. Konings en almal wat belangrik is, julle moet luister. Ek wil vir die Here sing, ek wil musiek maak vir die Here, die God van Israel. Here, die aarde het geskud, en daar het water gedrup uit die wolke in die lug toe U uit die land Seïr gekom het, toe U gekom het uit die veld van Edom. Ja, die berge het gebewe voor die Here wat van Sinai-berg kom, die berge het gebewe voor die God van Israel.
Rigters 5:18-22 Bybel vir almal (ABA)
Maar die mense van Sebulon en Naftali was nie bang nie. Hulle het kom wagstaan op die berge van die land. Konings het kom oorlog maak, die konings van Kanaän het oorlog gemaak in Taänak by die Megiddo-water, maar hulle het nie die Israeliete oorwin en hulle silwer gevat nie. Die sterre het van bo in die lug oorlog gemaak, hulle het op hulle pad gebly en oorlog gemaak teen Sisera. Die Kison-rivier het Sisera se mense weggespoel, die Kison-rivier wat baie oud is. Maar ek kon verder gaan, ek was sterk. Die perdepote het geraas op die grond, Sisera se soldate het gevlug op hulle perde.
Rigters 5:31 Bybel vir almal (ABA)
“Here, ek bid dat dit met al u vyande sal gaan soos met Sisera, en dat almal wat lief is vir U, sal wees soos die son wat helder skyn.” Daar was 40 jaar lank vrede in die land.
RIGTERS 5:1-5 Afrikaans 1933/1953 (AFR53)
OP dié dag het Debóra en Barak, die seun van Abinóam, gesing en gesê: Omdat aanvoerders aangevoer het in Israel, omdat die volk hom gewillig getoon het — prys die HERE! Hoor, o konings! Luister, o vorste! Ek, tot eer van die HERE wil ek sing, tot eer van die HERE, die God van Israel, wil ek psalmsing. HERE, toe U uitgetrek het uit Seïr, toe U voortgestap het uit die veld van Edom, het die aarde gebeef, ook het die hemel gedrup, ook het die wolke water gedrup. Berge het gewankel voor die aangesig van die HERE uit, hierdie Sinai voor die aangesig van die HERE, die God van Israel.
RIGTERS 5:18-22 Afrikaans 1933/1953 (AFR53)
Sébulon is 'n volk wat sy siel gering ag tot die dood toe; ook Náftali op die hoogvlaktes. Konings het gekom, geveg; toe het die konings van Kanaän geveg by Táänag, by die waters van Megíddo — geen stuk silwer het hulle geneem nie. Uit die hemel het die sterre geveg, uit hulle bane het hulle teen Sísera geveg; die spruit Kison het hulle afgedrywe, die spruit van ontmoeting, die spruit Kison! Tree op, my siel, met mag! Toe het die perdepote geklap van die gejaag, die gejaag van hulle geweldiges.
RIGTERS 5:31 Afrikaans 1933/1953 (AFR53)
So moet al u vyande, HERE, omkom! Maar die wat Hom liefhet, is soos die opgang van die son in sy krag. En die land het veertig jaar lank gerus.
RIGTERS 5:1-5 Afrikaans 1983 (AFR83)
Daardie dag het Debora en Barak seun van Abinoam gesing: “Julle moet die Here prys, want leiers het opgetree in Israel, die volk het hulle aangemeld vir die oorlog. Luister, konings, gee aandag, regeerders! Ek sing tot eer van die Here, ek prys die Here die God van Israel met my lied: Toe U uit Seïr gekom het, Here, toe U uit die veld van Edom opgetrek het, het die aarde gebewe, het die hemel reën gegee: die wolke het strome water gegee. Die berge het weggesmelt voor die Here, voor Hom uit Sinai, voor die Here die God van Israel.
RIGTERS 5:18-22 Afrikaans 1983 (AFR83)
Sebulon was nie bang vir die dood nie en Naftali het die dood getrotseer op die hoogland. “Konings het gekom, hulle het geveg, die konings van Kanaän het geveg by Taänak, by Megiddo se waters, maar hulle het nie silwer buitgemaak nie. Uit die hemel het die sterre geveg, uit hulle bane het hulle teen Sisera geveg. Die Kisonrivier het die vyand meegesleur, die Kisonrivier, die rivier uit die voortyd. “Hou moed! Wees sterk! “Die perde het met hulle hoewe gekap, die sterkes het in jaaggalop voortgestorm.
RIGTERS 5:31 Afrikaans 1983 (AFR83)
“Mag al u vyande so omkom, Here, maar mag dié wat vir U liefhet, wees soos die son wat in sy volle krag skyn.” Daarna was daar veertig jaar lank vrede in die land.
RIGTERS 5:1-5 Die Boodskap (DB)
Op daardie dag het Debora en Barak seun van Abinoam hierdie lied gesing: “Toe Israel se leiers voorloop, het die volk hulle vrywillig en met blydskap gevolg. Prys die Here! Luister, konings! Hoor mooi, regeerders! Ek sing tot eer van die Here, ek eer die Here, die God van die Israeliete, met my lied. Here, toe U van die berge in Seïr af gekom het en oor die vlaktes van Edom opgetrek het, het die aarde gebewe onder u groot krag en die hemel het reën gegee. Die water het in strome uit die wolke geloop. Die berge het gesmelt van vrees voor die Here van Sinai, voor die Here, die God van Israel.
Rigters 5:18-22 Die Boodskap (DB)
Maar Sebulon was bereid om lewens te waag in die stryd. Naftali het die dood op die berge in die oë gekyk. “Die konings van Kanaän het gekom, hulle het by Taänak en die fonteine van Megiddo oorlog gemaak, maar hulle het nie oorlogsbuit saam met hulle teruggevat nie. Die sterre van die hemel het ook geveg; soos hulle deur die hemel beweeg, het hulle teen Sisera geveg. Die Kisonrivier, die eeue oue Kisonrivier, het die vyand meegesleur. “Moenie bang wees nie! Wees sterk! “Toe het die perde die aarde laat dreun soos hulle aangestorm kom.
Rigters 5:31 Die Boodskap (DB)
“Mag al u vyande so doodgaan, Here, maar mag dié wat U liefhet, wees soos die son wat opkom en met sy volle glorie oor die aarde skyn.” Hierna was daar 40 jaar lank vrede in die land.
RIGTERS 5:1-5 Nuwe Lewende Vertaling (NLV)
Debora en Barak, die seun van Abinoam, het daardie dag ’n lied gesing: “Prys die HERE! Israel se leiers het opgetree, die volk het hulle kom aanmeld vir oorlog. “Luister, konings, spits julle ore, regeerders! Ek sing vir die HERE, ek prys die HERE, die God van Israel, met my lied. “HERE, toe U opgetrek het en deur die veld van Edom marsjeer het, het die aarde gebewe, reën het uit die lug gestort, wolke het strome water gegiet. Die berge het ineengekrimp voor die HERE, Sinai voor die teenwoordigheid van die HERE, God van Israel.
RIGTERS 5:18-22 Nuwe Lewende Vertaling (NLV)
Sebulon was nie bang om te sterf nie, ook nie Naftali op die gevegsfront nie. “Konings het kom veg. Die konings van Kanaän het by Taänak kom veg, by die fonteine van Megiddo, sonder om silwer buit te maak. “Die sterre het van bo uit die lug geveg, hulle het van bo uit hulle bane teen Sisera geveg. Die Kisonspruit het die vyand weggesleur, Kison, die rivier uit die oertyd. “Marsjeer aan, wees dapper! “Die hoewe van die perde het geklap op die grond. Sisera se dapper manne het op ’n jaaggalop weggestorm.