Жыві паводле Духа: Пасьвячэньні ад Джона ПайпэраУзор

Дух уваскрашае нашыя целы.

"Калі ж Дух Таго, Хто ўваскрэсіў зь мёртвых Ісуса, жыве ў вас, дык Той, хто ўваскрэсіў Хрыста зь мёртвых, ажывіць і вашыя сьмяротныя целы Духам Сваім, Які жыве ў вас." - Рымлянаў 8:11

Бог вельмі рупіцца пра тваё цела. Калі б тое не было праўдаю, дык Ён дазволіў бы яму гніць у магіле, маўляў, нарэшце пазбавіліся! Але Ён ніколі ня кажа гэтага. Не, Ён стварыў цябе зь целам, і Ён стварыў цябе дзеля Свае славы.

З гэтае прычыны Ён уваскрэсіць цябе і ажывіць тваё сьмяротнае цела Сваім Духам, нягледзячы на тое, наколькі яно зьнявечанае, дэфармаванае, слабое або скалечанае хваробай, і Ён зробіць яго гэтакім моцным, гэтакім здаровым, гэтакім прыгожым, што калі я ўбачу яго, дык скажу: "Ты падобны да шырокага блакітнага неба ўлетку. Ты падобны да бляску мільёну зорак на чорным небе ўначы. Тваё зьзяньне падобнае да зьзяньня сонца; так, я бачу ў табе веліч славы Ісуса Хрыста, Які стварыў цябе, збавіў цябе, уваскрэсіў цябе і праславіў цябе Сваёю славаю назаўжды."

Дзе ўзяць сілы жыць у любові, калі сьвет гэта ніяк не ўзнагароджвае? Дзе мужу або жонцы знайсьці эмацыйную сілу даваць, калі няма ўзаемнасьці? Дзе мужчына або жанчына, што хоча ажаніцца або выйсьці замуж, можа знайсьці сілу задаволіцца застацца нежанатым або незамужняй на працягу 70 гадоў? Адкуль у Ісуса была сіла вытрываць крыж і сорам? (Габрэяў 12:2)

Мы трываем усё дзеля Хрыста, дзеля абяцанае нам радасьці. Ісус не абяцаў, што сьвет узнагародзіць нашую Яму паслухмянасьць. Нашая радасьць цячэ зь трывалай надзеі, апісанай у Рымлянаў 8:11, а не са зьменлівых абставінаў жыцьця. "Калі ж Дух Таго, Хто ўваскрэсіў зь мёртвых Ісуса, жыве ў вас, дык Той, хто ўваскрэсіў Хрыста зь мёртвых, ажывіць і вашыя сьмяротныя целы Духам Сваім, Які жыве ў вас."

Калі ты сапраўды верыш, што Бог за цябе, а ня супраць цябе, і што Ён ажывіць тваё сьмяротнае цела Сваім Духам, Які жыве ў табе, і ў што калі ты аддасі дабро ў гэтым жыцьці, то атрымаеш у сто разоў больш у дзень уваскрэсеньня праведных (Лукаша 14:12-14), і што ты зазьзяеш, нібыта сонца, у валадарстве твайго Бацькі, дык тое значыць, што ў цябе ёсьць невычэрпнае сховішча сілы на тое, каб працягваць рабіць тое, да чаго Бог паклікаў цябе, незалежна ад таго, ці падабаецца гэта людзям.

Даведайся болей: http://www.desiringgod.org/messages/the-spirit-will-give-life-to-your-mortal-bodies