Жыві паводле Духа: Пасьвячэньні ад Джона ПайпэраУзор

Дух - гэта радасьць Бога.

Сьвяты Дух зьяўляецца Богам. Асоба, якая жыве ў нас, дае нам накірунак ды ачышчае нас - гэта ніхто іншы, як Бог, Сьвяты Дух. Тытул "Божы Дух" ясна паказвае гэта. Дух зьяўляецца "Божым" не таму, што Бог стварыў Яго, а таму, што Ён мае Божы характар і адвечна паходзіць ад Бога (гл. 1 Карынцянаў 2:10–12).

Калі Божы Сын зьяўляецца гэтакім жа адвечным, як Бог-Бацька (а Яна 1:1–3 ясна тлумачыць, што так і ёсьць), дык тады Сьвяты Дух таксама зьяўляецца гэтакім жа адвечным, як Бог-Сын і Бог-Бацька, бо згодна з Рымлянаў 8:9–11 Хрыстоў Дух - гэта Божы Дух. Калі б тое не было праўдаю, дык мы мусілі б уявіць сабе час, калі Сын ня меў Духа і Бацька ня меў Духа. Але Сьвяты Дух зьяўляецца істотным у адносінах паміж Бацькам ды Сынам. Як напісаў Хэндлі Моўл, Ён зьяўляецца "Вынікам, Повязьзю ды Правадніком іхняе вечнае ўзаемнае радасьці ды любові" ("Person and Work of the Holy Spirit", ст. 28).

Бог-Бацька заўсёды любіў Свайго Сына, і зь Імі двума заўсёды прысутнічаў бясконцы Сьвяты Дух любові й радасьці, Які Сам зьяўляецца боскаю Асобаю. З гэтае прычыны можна зрабіць выснову, што, молячыся за царкву ў Яна 17:26, Ісус просіць Свайго Бацьку менавіта Сьвятога Духа, калі кажа: "І Я паведаміў ім імя Тваё і паведамлю, каб любоў, якою Ты палюбіў Мяне, у іх была, і Я ў іх."

Найцудоўнешая праўда, якую мы з табою адкрыем для сябе праз гэтыя сем чытаньняў-пасьвячэньняў, - гэта тое, што калі Сьвяты Дух прыходзіць у нашае жыцьцё, дык Ён прыходзіць ня проста як Дух Сына або Дух Бога-Бацькі, але як Дух бясконцае любові паміж Сынам ды Бацькам, дзеля таго, каб мы маглі любіць Бацьку любоўю Сына і любіць Сына любоўю Бацькі.

Даведайся болей: http://www.desiringgod.org/messages/the-holy-spirit-he-is-god