Жыві паводле Духа: Пасьвячэньні ад Джона ПайпэраУзор

Дух пераадольвае страх.

"Бо Я вылью вады на спрагненае; вылью дух Мой на племя тваё і дабраславеньне Маё на нашчадкаў тваіх." - Ісаі 44:3

Ці ты ведаеш, чаму быць ветлівым да іншых даецца лягчэй у пятніцу, чымся ў панядзелак? Ці гэта не адбываецца праз тое, што надзея - нібыта рака, што цячэ ў нас са сьветлае будучыні, напаўняючы наш рэзэрвуар радасьці ды пераліваючыся дабрынёю да іншых?

У пятніцу вось-вось пачнуцца адпачынак ды гуляньне, яны гэтак блізка, што да іх, здаецца, можна дакрануцца. Праз надзею мы адчуваем сілу выходных, што вось-вось пачнуцца. Наш маленькі рэзэрвуар радасьці пачынае напаўняцца. І калі выходныя выглядаюць дастаткова прывабна, то наш рэзэрвуар радасьці напаўняецца да верху і пачынае разьлівацца.

Гэты "разьліў" радасьці да іншых называецца любоўю. Калі будучыня падаецца табе шчасьлівай, дык ты заўсёды больш ветліва ставіцца да іншых. Надзея напаўняе цябе радасьцю, і радасьць разьліваецца ў выглядзе ўсьмешак, ветлівых словаў ды добрых учынкаў. Такое здараецца перад вакацыямі, перад днём народзінаў, перад Раством і - для бальшыні людзей - у пятніцу.

Калі мы напоўненыя Сьвятым Духам, дык мы напоўненыя пэўнасьцю, што Бог стварыў панядзелак гэтак жа, як і пятніцу. Ты ня мусіш баяцца таго, чаго баісься, калі ты напоўнены Духам. Так, сямейныя стасункі могуць быць складанымі, тваё здароўе можа пагаршацца, начальнік можа плянаваць тваё звальненьне, заўтра можа адбыцца непрыемная канфрантацыя - але, нягледзячы на тое, што вымушае цябе турбавацца аб заўтрашнім дні, адчыні тваё сэрца Божаму Духу; прыгадай Ягоныя абяцаньні, і Ён напоўніць цябе надзеяй і пераадолее твой страх.

Калі прыходзіць Сьвяты Дух, тады ня толькі зьнікае страх, але й спаўняюцца жаданьні. Душэўная смага наталяецца - або, прынамсі, мы пачынаем разумець, што мы можам піць зь Яго заўсёды, бо толькі Ён наталяе.

Нашая будучыня можа выглядаць безнадзейна празь дзьве прычыны: пачуцьцё таго, што здарыцца няшчасьце, і пачуцьцё таго, што шчасьце ня здарыцца. І ці ня праўда, што бадай што ўсе прагненьні чалавечага сэрца зводзяцца да гэтых дзьвюх рэчаў: страх будучага няшчасьця ды прага будучага шчасьця? Калі так, дык абяцаньне з Ісаі - гэта як раз тое, што нам патрэбна: калі ў нашае сэрца ліецца Дух, тады зьнікае страх і прага наталяецца. З гэтае прычыны, калі ты прагнеш дотыку Божага Духа ў тваім жыцьці, раю табе прысьвячаць час днём і ноччу на чытаньне Божага Слова.

Даведайся болей: http://www.desiringgod.org/messages/a-precious-promise-the-outpouring-of-gods-spirit