Жыві паводле Духа: Пасьвячэньні ад Джона ПайпэраУзор

Дух дапамагае нам паміраць.

"Калі клянуць вас за імя Хрыстовае, дык вы дабрашчасныя, бо Дух славы, Дух Божы спачывае на вас." - 1 Пятра 4:14

Коры Тэн Бум распавядае, як яна ў маленстве турбавалася, ці здолее даць супраціў немцам, калі б яны ён пагразілі. Яна адчувала сябе вельмі слабою, калі ўяўляла сабе тое, што магло здарыцца. Ейны бацька даў ёй цудоўную ілюстрацыю. Ён сказаў: "Калі мы едзем цягніком, дык я даю табе білеты за тры тыдні або перад самым ад'ездам?" Яна адказала: "Перад самым ад'ездам." "Госпад гэтак жа дасьць табе асаблівую сілу, каб ты была моцная перад сьмерцю, тады, калі сіла табе патрэбна, а ня загадзя."

Думаю, 1 Пятра 4:14 абяцае, што Бог прыходзіць да Сваіх дзяцей падчас найцяжэйшага выпрабаваньня і дае ім мужнасьць ды веру, на якія яны раней не былі здатныя. Сьвяты Дух дапаможа табе памерці.

Прынята думаць, што Нэрон сьсёк галаву Паўлу. 2 Цімафея, напэўна, быў апошнім лістом, які напісаў Павал. Судовы працэс ужо распачаўся. Уяві сабе гэтага старога жаўнера са шнарамі дзеля свайго Капітана, у астрозе. Яго клічуць у суд. Кожны ведае, што жыць яму засталося мала. Ягоныя сябры пакінулі яго. Ён абараняецца. Прымаецца рашэньне слухаць яго яшчэ раз - а потым канец. Ён вяртаецца ў астрог і піша гэтыя словы Цімафею (2 Цімафея 4:16-17): " У першай маёй абароне ніхто не прыйшоў да мяне, але ўсе мяне пакінулі. Няхай ня будзе ім палічана! Госпад жа стаў перада мною і ўмацаваў мяне."

Малюся, каб ты запомніў гэтыя словы: Дух дапаможа табе памерці. Ён будзе з табою, калі больш нікога няма. Ён умацуе тваю веру. Ён пакажа табе пробліскі нябеснае славы. Ён зробіць так, каб ты праславіў Хрыста ў тваёй сьмерці. Мужнасьць, якую раней ты нават ня мог сабе ўявіць, будзе тваёю. Дух славы, Божы Дух, будзе з табою і прывядзе цябе дахаты.

Даведайся болей: http://www.desiringgod.org/messages/the-holy-spirit-will-help-you-die