Die Sewe Rolle Van Die Heilige GeesVoorbeeld

Die Heilige Gees Is Ons Gids

Die Gees het toegang tot al die wysheid en kennis van God. Wanneer ons in Hom bly, lei Hy ons voortdurend in die waarheid — wat ons geestelik laat groei en volwasse word. Hy is ons Leermeester (1 Johannes 2:27), en diegene wat op Hom vertrou sal weet waarheen om te gaan en wat om te doen, want hulle volg sy hemelse aanwysings.

In Romeine 8:14 lees ons: "Almal wat hulle deur die Gees van God laat lei, is kinders van God." As jy 'n kind van God is, het jy toegang tot die leiding van die Heilige Gees.

Hy is die beste gids ooit, want Hy het al die inligting wat jy uit die verlede, die hede en die toekoms nodig het. Ek is oud genoeg om te onthou toe mense nie GPS-programmatuur op hul fone (of op enige ander toestel) gehad het nie! Ons moes padkaarte in die paneelkissie van ons motors hou — gevoude kaarte van papier! Ons het hulle gebruik om uit te werk hoe om by 'n onbekende adres uit te kom. As ek aan daardie dae terugdink toe ons kaarte bestudeer het (en vir aanwysings by vulstasies gevra het), wonder ek hoe enige van ons ons bestemmings bereik het.

Die Heilige Gees is soos 'n GPS binne-in jou, behalwe dat Hy nooit deurmekaar raak of verkeerde inligting aanbied nie. As jy egter die Heilige Gees se leiding wil ervaar, moet jy leer om sy stem te onderskei en sy subtiele stampies wat rigting aanwys.