Hier Is Ek, HereVoorbeeld

GEE ’N TREE NA HOM TOE

Soms behels die draai-na-God-toe net ’n enkele tree. Dié wat glad nie in God glo nie, kan dalk net hul ongeloof begin betwyfel. Dié wat wel glo, maar God oënskynlik nie nodig het nie, kan dalk hul behoefte besef. Dié wat ’n behoefte na God het, kan na Hom begin soek. Dié wat God soek, sal Hom beslis vind! Dié wat God gevind het, sal begin leer wat dit is om met Hom te lewe – en dié wat saam met God leef, sal geestelik groei en volwasse word in Hom.

Elkeen kan een tree nader aan God gee, waar hy of sy ook al is. Die vraag is dus dít: Waar staan jy tans teenoor die Here? Nog belangriker: Wat is jou volgende stap na Hom toe? Tree tog na God toe – Hy sal jou dadelik tegemoet kom! Sy uitnodiging is onvoorwaardelik.

Here, ek wil na U toe kom. Help my om die volgende stap te neem. Amen.