In ons soeke na identiteit, ontmoet die gekruisigde en opgestane Christus ons nét waar ons is. Net soos ons, het Hy óók nodig gehad om te weet wie Hy is. Die evangelies is duidelik hieroor. Na refleksie, maak die Anglikaanse teoloog, Thomas Smail, die volgende waarneming rakende hierdie kwessie: “Jesus het nie net een keer nie, maar oor en oor, gedurende elke deel van Sy missie, en deur elke krisis in Sy lewe en dood, ‘n opnuut-bevestigde wete van Sy identiteit nodig gehad.” 

Anders as ons het Jesus egter, toe Hy wou weet wie Hy is, geluister na Sy Vader se stem, daardie stem vertrou, en die waarheid daarvan vir Sy eie lewe aanvaar. Onthou daardie beslissende oomblik, toe Jesus deur Sy neef, Johannes, in die Jordaanrivier gedoop is. Dertig vormende jare van versteekte voorbereiding het hier tot ‘n einde gekom; Sy openbare bediening sou nou begin. Soos Jesus uit die water kom, hoor Hy ‘n stem uit die hemel. Die evangelieskrywers, Matteus, Markus en Lukas, vestig almal ons aandag op dít wat Hy hoor. Jesus beklemtoon hoe belangrik dit is dat ons weet wie ons is. 

Te danke aan Sy innerlike oortuiging dat Hy God se geliefde is, is Hy deurgaans sy eie persoon, en kan Hy heelhartig van homself gee, tot Hy die laaste daad van selfoorgawe op die kruis voltooi. Omdat Hy geborge is in ‘n interaktiewe verhouding met Abba Vader, kan Hy die versoekings in die wildernis, om ‘n identiteit te skep wat berus op die illusies van sukses, populariteit en mag, weerstaan. Nie één keer in Sy lewe het Hy nodig gehad om Homself te bewys, die goedkeuring van mense te soek, of betrokke te raak by manipulerende magspele nie. Omdat Hy geweet het wie Hy is, kon Jesus Homself met oorgawe daartoe toewy om Sy Vader se koninkryksvisie vir ons wêreld te volbring.  

Refleksie 

Elke keer wat jy vandag in die spieël kyk, sê hardop vir jouself: “Jy is iemand oor wie God homself verheug.”  

Gebed 

Here, laat my hart en verstand ontwaak tot wie ek regtig is.

Die Boodskap vir jou Lewensreis

Daaglikse oordenking wat voortbou op die dag se tema