Vrouens wat Wen: Hoe om Volgens God se Manier in Jou Huwelik te WenVoorbeeld

Wen in die Huwelik deur Nederigheid

Trots kies die houding en optrede van die wêreld om altyd reg te wees. Dit soek sy eie weg en verbly hom wanneer daar bewyse is dat ander mense verkeerd is. Trots dra ook by tot die onregverdige mishandeling en swak rentmeesterskap in die huwelik. Dit skep blinde kolle, verhoed dat paartjies foute in hul optrede sien en dra by tot verkeerde houdings en gedrag wat na eindelose rampspoed in die huwelik lei. Trots is die teenoorgestelde van nederigheid, en dit is die wortel van baie onopgeloste konflikte in die huwelik.

Die apostel Petrus beveel julle om julself met nederigheid teenoor mekaar te klee (1 Petrus 5:5). Om dit te doen is net soos om daagliks jou natuurlike klere aan te trek — jy doen dit om te bedek wat vir jou die kosbaarste is, jou liggaam. Wanneer julle as 'n paartjie julle in nederigheid beklee, beskerm jy die menseverhouding wat die naaste aan jou is, jou huwelik. Jy beskerm dit teen jaloesie, twis, afguns, bitterheid, haat, onvergewensgesindheid, en alle negatiewe en neerhalende gedagtes en gevoelens teenoor jou huweliksmaat en huwelik. Om jouself met nederigheid te beklee, gee vir elkeen die ruimte om mekaar deur geloof en liefde te dien. Om vergifnis te bied en te ontvang, word makliker wanneer nederigheid aktief in jou huwelik werk. Wanneer nederigheid aan die werk is, word dit eerder 'n eer as 'n las om na die belange van jou maat bo jou eie om te sien.

Die wêreld wil hê jy moet dink dat nederigheid 'n flou gesindheid is. Dit wil hê dat julle dae, weke, maande of selfs jare lank 'n wrok teenoor mekaar moet koester. Nederigheid word verkeerd verstaan deur te dink jy is waardeloos, hopeloos of hulpeloos. Wanneer jy egter na nederigheid kyk vanuit 'n Bybelse definisie en hoe dit in die lewens van Paulus, Dawid, Josef en selfs Jesus gedemonstreer is, sien ons dat nederigheid beteken om sonder eiewaan, sagmoedig en beskeie in jou gees te wees. Sulke individue is beskeie sodat ander eerder verhoog kan word. Hulle het hulself verloën sodat ander vryheid in Christus kan ervaar. 

Wanneer nederigheid bestendig en voortdurend in jou huwelik beoefen word, sal die Satan nooit wen nie. Hy sal nie in staat wees om jou teen jou huweliksmaat af te speel of oomblikke van moedeloosheid en teleurstelling as 'n toegangspunt te gebruik om harmonie te vernietig nie. Nederigheid skep 'n sterker band tussen jou en jou maat, wat die nodige ondersteuning bied vir jou huwelik om te floreer. 

Nadenke: Hoe kan jy in jou huwelik in nederigheid teenoor jou lewensmaat optree?