Jeto me forcë dhe guxim!Shembull

“Ambasadori i qiellit - Fryma e Shenjtë”

Ambasadori është një përfaqësues zyrtar i një qeverie, i dërguar në një vend tjetër për të jetuar mes popullit të saj, për të përmbushur një mision paqeje dhe vullneti të mirë. Ai i përmbush detyrat me autoritetin, bujarinë dhe burimet e qeverisë që përfaqëson. Duke patur besim maksimal, ai e përmbush qëllimin e tij me dinjitet deri në fund.

Misioni i Frymës së Shenjtë i ngjan misionit të një ambasadori nga qielli, në shumë mënyra. Fryma e Shenjtë mishëron gjithë autoritetin, fuqinë dhe burimet e Perëndisë dhe shpreh e zbulon dashurinë e Tij ndaj çdo personi në tokë nëpërmjet pranisë dhe punës së Tij.

Ndërsa koha e Jezusit me dishepujt e Tij po vinte drejt fundit, Ai u tha atyre se pasi të largohej nuk do të ishin vetëm. Ai u tregoi atyre për Dikë që do të dërgohej në vendin e Tij që të ishte me ta, t'i udhëhiqte, mësonte, ngushëllonte dhe drejtonte - Frymën e Shenjtë. Jezusi tha:

“…Po nuk shkova, nuk do të vijë te ju Ngushëlluesi; por, po shkova, unë do t’jua dërgoj.” Gjoni 16:7

Pas përfundimit të veprës së Jezusit në tokë, Ai dërgoi Frymën e Shenjtë që të jetë me ne në vend të tij, derisa ai të kthehet sërish. Fryma e Shenjtë jep për jetët tona drejtim, udhëheqje, ngushëllim dhe këshillim. Jezusi ua përshkroi Frymën e Shenjtë dishepujve të Tij kështu:

“…Por Ngushëlluesi, Fryma e Shenjtë, që Ati do ta dërgojë në emrin tim, do t’ju mësojë çdo gjë dhe do t’ju kujtojë të gjitha këto që ju thashë.” Gjoni 14:26

Prania e Perëndisë sot me ne është në formën e Frymës së Shenjtë dhe Ai është aktivisht i përfshirë në botën dhe jetët tona.