Waarom Is Ek So Bevoorreg?

Die Kersverhaal is goeie nuus as jy al ooit gevoel het jy is onbeduidend, ongekwalifiseerd of oor die hoof gesien. Waarom? Want daardie soort mense is die hoofkarakters in die Kersverhaal. 

Vergeet vir 'n oomblik alles wat jy van die Kersverhaal weet. Gereed? Goed, verbeel jou jy het uitgevind dat God op die punt staan om aarde toe te kom, en jy het geweet Hy sou in 'n menslike familie gebore word. Watter soort mense sou God kies om sy ouers te wees?  

Miskien 'n vooraanstaande godsdienstige familie, of hoe? Indien nie hulle nie, waarskynlik 'n getroude paartjie met baie hulpbronne, spesiale vaardighede en 'n volledige CV van geestelike prestasies. 

Onthou egter, die Kersverhaal is vol verrassings. God kies dus nie 'n ryk, magtige getroude paartjie nie. In plaas daarvan kies Hy een van die laaste mense wat jy sou verwag.  

Maria was jonk en enkellopend en het in 'n klein dorpie gewoon. Sy het geen mag en baie min invloed gehad. Sy was doodgewoon, maar God het haar gekies om iets buitengewoons te doen. 

'n Boodskapper van God sê vir Maria dat sy swanger is met die beloofde Verlosser, al is sy 'n maagd. Vandag sal ons lees hoe Maria gereageer het op die ontdekking van haar verrassende rol in God se verhaal. Vir Maria is die nuus 'n teken dat God mense soos sy raaksien en vir hulle omgee. Ook dat hierdie Verlosser die mense sou verhef wat die wêreld as onbeduidend beskou. 

Die Kersverhaal verwerp die idee dat jy rykdom, invloed of 'n platform nodig het om 'n verskil te maak. Onbeduidende, doodgewone en ongekwalifiseerde mense maak vir God saak. Hy kies dus om met hulle saam te werk om vir die wêreld te wys dat Hy vir almal omgee.

Die volgende keer as jy onbeduidend of ongekwalifiseerd voel, onthou dan die Kersverhaal. Dit is 'n kragtige herinnering dat ons waarde van God kom, wat ons sien, ons liefhet en met ons wil saamwerk om ander in God se familie in te nooi.

Bid: Liewe Vader, ek is so dankbaar vir u liefde. Help my om my eiewaarde te baseer op hoe diep U my liefhet, nie op iemand anders se menings nie. Lei my asseblief na mense wat seergemaak en onbeduidend voel, sodat ek aan hulle dieselfde sorg kan gee wat U aan my bewys. In die Naam van Jesus. Amen.