Leef 'n Gelukkige Lewe: 'n 7-dag Leesplan vir Ouers: Hoe Om Deur Aanvaarding Te Leef — Nie Vir Aanvaarding NieVoorbeeld

Dag Vyf: Die Weg van Vreugde

Die boek Psalms begin met 'n beskrywing van die geseënde lewe. Die regverdige, is die persoon wat sy vreugde in die gebooie van die Here vind (vers 2). Iemand wat 'n lekker maaltyd geniet, eet nie bloot die kos nie, maar geniet die geure en die samesyn met sy vriende of gesin. Die gelukkige persoon lees nie bloot die voorskrifte van die Here nie, maar vind vreugde daarin. Daar is 'n groot verskil om uit plig tyd met God deur te bring — in 'n poging om Hom sover te kry om jou lief te hê — teenoor tyd uit vreugde met God deur te bring omdat jy van sy liefde seker is.

Die persoon wat gelukkig is, wat hom in die Here verheug, kan vergelyk word met 'n groot boom. Toeriste reis kilometers om foto's van beroemde bome te neem. Die manjifieke Outeniekwa-geelhoute in die Knysna en Tsitsikamma woude wat bo die woudkroon uitsprei, en wat tot duisend jaar oud kan word, ontvang jaarliks meer as negentigduisend besoekers. Kremetartbome in Limpopo is weer bekend vir hul massiewe dik stamme. Daar is 'n unieke kremetartboom wat ongeveer 1060 jaar oud is en die stam is so dik dat daar 'n kroeg ingebou is. Mense wat nie in God gelukkig is nie — die goddeloses — word vergelyk met kaf wat deur die wind verstrooi word (vers 4). Kaf is die buitenste omhulsel van 'n saadjie. Dink aan die buitenste omhulsel van springmielies wat aaklig tussen jou tande voel. Niemand neem foto's van kaf nie! 

Psalm 1 herinner ons aan die einde van die twee moontlike paaie wat ons lewe kan neem. Ons kan ons blydskap in die Here vind, sy vergifnis ontvang, en blywende vreugde geniet omdat Hy oor ons waak. Of ons kan ons eie pad neem, die van die goddelose. Die einde van daardie pad lei tot ondergang omdat diegene op daardie pad nie in die oordeel sal voortbestaan nie.  

Die goeie nuus is dat Jesus daardie noue weg vir ons volmaak gestap het. As ons Hom vertrou, plaas Hy ons op die regte pad, waak oor ons, en vul ons met sy vreugde. Dit sal vir ons moontlik wees om voor God te staan — nie omdat ons goed is nie, maar danksy Jesus se goedheid wat ons ontvang het. Wat 'n rede om gelukkig te wees!