Wapens van OorlogvoeringVoorbeeld

Daar is wonder-werkende krag in die bloed van die Lam. Bloed vloei deur die Bybel, net soos dit deur ons are vloei. As jy die Bybel sny, sal dit bloei; dit is 'n boek wat bloed verteenwoordig. Die woord "bloed" word meer as driehonderd keer in die Ou Testament genoem en drie-en-veertig keer in die Nuwe Testament. 

Ons het in die skool geleer dat ons liggame uit vyf tot sewe persent bloed bestaan. Bloed het sewe funksies in die liggaam: soos 'n asblik ontvang dit ons liggaam se afval; dra suurstof deur die liggaam; vervoer voedingstowwe; stel hormone vry; handhaaf vloeistofbalans; sirkuleer hitte, en beveg mikroörganismes. God het gesê: “Omdat die lewe van 'n dier in sy bloed is, het Ek die bloed vir julle gegee om op die altaar versoening te doen vir julle lewens. Omdat bloed versoening bring deur die lewe wat daarin is "(Levitikus 17:11). Net soos die bloed in ons liggame baie funksies het, so is daar krag in die bloed van Jesus. 

Ons kan sien dat die bloed van Jesus krag het. Jou witbloedselle se funksie is om die bakterieë en virusse te beveg wat jou liggaam binnedring en jou siek maak. Die bloed in jou liggaam is 'n wapen teen alle soorte vyande. 

Dieselfde word van Jesus se bloed gesê. Ons oorwin die duiwel deur sy bloed. Net soos ons bloed virusse en bakterieë beveg, word demone, die duiwel en geestelike duisternis, deur die bloed van Jesus oorwin. 

Dit word pragtig uitgebeeld toe die volk van Israel gereed gemaak het om Egipte te verlaat. Hulle het die bloed van 'n lam aan die sykante en bokant van hul huise se deurkosyne gesmeer. Daardie nag het die doodsengel hulle huise oorgeslaan. Deur die bloed van 'n onskuldige lam het hulle die Pasga ervaar. Dit was die aand toe hulle uiteindelike verlossing 'n werklikheid geword het. Die nege plae wat 'n tragiese ellende vir die Egiptenare gebring het, het nie verlossing vir die Jode gebring nie, maar hierdie een daad van bloedvergieting het die greep van hul vyand eens en vir altyd verbreek. 

Daar is krag in die bloed van Jesus. Glo hierin. Verklaar die bloed van Jesus oor die ingang van jou huis, jou gesin, jou eiendom, jou woonbuurt, jou gemeenskap, jou werkplek, ensovoorts. Smeer deur jou belydenis die bloed van Jesus op die deurkosyn van jou hart, denke en siel.