Liefde Vertraag GejaagdheidVoorbeeld

Soek Afsondering

Ons leef in 'n lawaaierige wêreld. Oral waar ons gaan, is daar 'n gonsery van beweging, musiek of gesprekke. Selfs wanneer ons omgewing stil is, is dit moeilik om al die geraas van bekommernis en angs in ons harte en gedagtes stil te maak. 

In Jesaja 26: 3 word ons daaraan herinner dat die sleutel om vrede te midde van enige situasie te vind, is om ons gedagtes op God se liefde gerig te hou. Wanneer ons op daardie liefde vertrou, bring dit vrede. Maar om dit te doen, moet ons noukeurig op ons gedagtes let. Ons moet nadink waaroor ons dink.

Jy sal nooit vrede vind as jy gedurig met angs en woede leef nie. Dit is nie een of twee negatiewe opskrifte of sosiale media-plasings wat angs bring nie; dit is die ophopende effek van al die geraas in ons wêreld. Dit is so subtiel dat ons gewoonlik nie besef hoeveel spanning opbou nie. 

Daarom is dit so belangrik dat ons gereeld tyd bestee om ons gedagtes met die Woord van God te vul. In Psalm 1 sê koning Dawid dat diegene wat in die woord van die Here mediteer, soos 'n boom sal wees wat langs 'n waterstroom geplant is. Dit verdroog nie en lewer goeie vrugte, omdat dit innerlike sterkte het. Dit is 'n prentjie van hoe jou lewe kan lyk as jy gereeld tye in afsondering met God deurbring. 

Afsondering is geestelike stilte. Dit is my definisie, nie die woordeboek s'n nie. Ek gebruik dié definisie, want vir baie van ons is dit net nie moontlik om gereeld fisiek alleen of ver van die wêreld se gevoel af te wees nie. Om alleen te wees, is ideaal vir afsondering, en ons moet 'n weg baan om alleen te wees, maar deur net alleen te wees beteken nie noodwendig dat jy geestelike stilte sal kry nie. Wanneer jy egter kies om oor die Woord van God te mediteer, kan jy geestelike stilte te midde van enige situasie vind. 

Daar is baie geleenthede gedurende die dag waar jy kan oefen om geestelike stilte te vind. Ry werk toe sonder musiek in jou motor. Gaan stap tydens jou middagete en bestee 'n paar minute in gebed. Sê die Skrif op terwyl jy jou klere opvou en bêre. 

Wanneer jou gedagtes dan begin dwaal na vrees, bekommernis of woede, verskuif dit dan na die Woord van God. Die goeie nuus is dat as jy jou kan bekommer, kan jy oor die Skrif mediteer. Wanneer jy jou bekommer, dink jy oor en oor aan negatiewe moontlikhede. Meditasie oor die Skrif is om oor en oor aan God se goedheid en waarheid te dink. Dit is dieselfde geestelike proses, maar jy sal beter resultate kry deur op die Woord van God te fokus. 

Wanneer jy vandag angstig of ontsteld begin raak, haal diep asem, hou jou gedagtes vry van bekommernis en herhaal vandag se vers weer en weer vir jouself. Jy sal met vrede in jou hart en gedagtes gevul word, want dit is God se belofte aan jou.