Reis Saam Met Jesus — 40 Dae Lydenstyd OordenkingVoorbeeld

Ons begin die Lydenstyd se oordenking met iemand wat verstaan het waaroor dit gaan. Maria, die suster van Marta en Lasarus het dit inderdaad verstaan. Sy het in werklikheid meer verstaan as die verontwaardige dissipels wat haar probeer stop het om die reukolie op Jesus te "vermors". Sy het dalk verstaan dat Jesus nie meer lank met hulle sou wees nie. 

Haar reaksie op Jesus se naderende dood, is pragtig. Sy het Hom aanbid. Nie 'n terloopse, nog-'n-blokkie-wat-ek-kan-afmerk aanbidding nie. Maar 'n uitspattige aanbidding wat haar nie die koste laat bereken het nie. Dit was 'n eerbiedige aanbidding, 'n uitsonderlike aanbidding, dalk selfs 'n irrasionele aanbidding. Sy het nie na die horlosie, haar beursie of na mense om haar gekyk wat 'n vinger na haar gewys het nie.

In stede daarvan het sy na Jesus gekyk. Sy het net op Hom gefokus en alle ander dinge rondom haar uitgesluit. Sy het aanbid asof niemand na haar gekyk het nie.

Oordink

Wat is my reaksie op Jesus se kruisdood? Gee ek Hom 'n offer van aanbidding en lofprysing? Of is my offer hierdie Lydenstyd meer ingestel op dit wat tot my eie voordeel is?

Gebed

Hemelse Vader, help my om U met my hele wese te aanbid. Help my om U lief te hê met my hele hart, my hele siel, met al my krag en met my hele verstand, en nie net met woorde nie. Laat my nooit tevrede wees met louwarm aanbidding nie, maar laat my vlam van geloof brand, aangevuur deur 'n diep ontsag vir U. Amen.