Lewensbeginsels Waarvolgens Jy Kan LeefVoorbeeld

Dis opwindend om God te vertrou

Lewensbeginsel 9: Om op God te vertrou beteken om verder te kyk as wat ons kan sien, om te kyk na wat God kan sien.

Op een of ander stadium sal elkeen van ons kolossale beproewings en moeilikhede in die gesig staar. Dis hoekom ons moet weet hoe om op elke bedreiging te reageer; deur vas te hou aan die soort oorwinnaarsgeloof wat verder kyk as wat ons kan sien, en kyk na wat God kan sien.

In tye van groot druk versterk God ons geloof en verdiep ons afhanklikheid van Hom. Sonder 'n sterk, blywende geloof, kan ons maklik toegee aan versoeking en vrees, veral wanneer die moeilikhede of die beproewings intens en uitgerek is. 

Ongeag watter Goliat of reus jou ook al in die gesig staar, is dit nodig dat jy een waarheid diep in jou hart bêre: God het jou lief, en wanneer jy Hom vertrou, sal Hy jou help om te oorkom. Jy mag dalk deur tye van mislukking gaan. Die lewe mag dalk nie altyd uitdraai soos wat jy dit beplan het nie. Maar uiteindelik sal God verheerlik word, en jy sal geseënd wees.

Elke uitdaging gee 'n geleentheid vir die Here om sy getrouheid en liefde te toon. In plaas daarvan om gedagtes van vrees of mislukking te koester, besluit eerder om op God te vertrou, al weet jy nie wat die volgende dag gaan bring nie. Leer jouself om verder te kyk en te sien wat God sien.

Hoe kry jy daardie soort geloof?

• Herinner jouself aan oorwinnings uit die verlede.
  
• Verwerp ontmoedigende woorde.
  
• Herken die ware natuur van die geveg.
  
• Reageer met 'n positiewe belydenis op die uitdaging.
  
• Maak staat op God se krag.
  
• Gee ag op die oorwinning.

Jy kan enige omstandigheid met vertroue en hoop benader, want dit is nie jou krag, wysheid, energie of mag wat die oorwinning bring nie. Oorwinning kom slegs as gevolg van Christus se vermoë. En as jy jou vertroue in Hom plaas het jy 'n onweerstaanbare krag wat niemand en niks suksesvol kan teenstaan nie.