Soma Biblia Kila Siku Desemba 2021Mfano

Maono haya hulenga kuonyesha hukumu ya yule kahaba mkuu (m.1). Ni mfano wa utawala wa mpinga Kristo ambao nguvu yake ni ya kidini hasa. Katika m.5 ametajwa mwanamke aitwaye Mama wa Makahaba, na ukahaba ni uasherati. Lakini pamoja na maana hii ya kawaida, Biblia pia huufananisha na hali ya kumwacha Mungu na kuiabudu miungu. Hali hii ni sawa na kuchukua vyote vizuri ulivyopewa na Mungu, ukajifanyia sanamu za wanaume, ukafanya mambo ya kikahaba juu yake (Eze 16:15-20). Lazima tutambue kwamba uwe uasherati wa kimwili au wa kiroho, makahaba wa namna zote huua! Tunaambiwa hivyo katika m.6 ikiandikwa kwamba huyo mwanamke amelewa kwa damu ya watakatifu. Jiepushe kabisa na vishawishi vyote vinavyotaka kukuvuta mbali na Mungu. Ahadi ya Kristo kwa waaminifu ni taji ya uzima. Bwana wetu Yesu anasema, Uwe mwaminifu hata kufa, nami nitakupa taji ya uzima (Ufu 2:10).