Өөрчлөгдсөн амьдрал: ЗорилгоЗагвар

Хүлээлт дотор

Энэ төлөвлөгөөний эхний гурван өдөр танд маш их зүйлийг бодох боломжийг олгосон. Хэрэв та өөрийнхөө цоглог байсан, сайн байсан, болон даван туулсан хэцүү зүйлсийнхээ хоорондын цэгүүдийг холбох гэж хичээн зүтгэж, үүнээсээ болж сэтгэлээр унадаг бол энэ нь ойлгомжтой юм. Шаналах юм уу стресст орохгүй байхын тулд хүлээх зуураа цагийг ашигла. Магадгүй Тэрээр хийх төлөвлөгөөгөө харуулахаасаа өмнө танд ямар нэг зүйлийг заахыг хүсэж байж болох юм. 

Миний хувьд, амьдралд минь зориулсан Бурханы төлөвлөгөөг томоор харахаасаа өмнө Түүний үнэний нүдээр өөрийгөө хэрхэн олж харж сурах нь тун чухал байсан юм. Би хэтэрхий олон удаа надад өргөх зүйл юу ч байхгүй гэсэн худал үгэнд итгэсэн бөгөөд энэ нь Бурханы надаар хийлгэх гэж хүссэн зүйлийг хийлгэхэд саад болох шахсан явдал байв. Би үйлчилж эхлэхдээ Бичээсийн талаар хангалттай мэдлэггүй, ямар нэг сонирхол татах авьяасгүй юм шиг санагдаж байсан. Хэдийгээр өөртөө итгэлгүй байсан ч миний өмнө тавих бүх зүйлд бууж өгөх болно гэж би Бурханд амласан юм. Би тав тухтай байдлаа орхиод үйлчлэхээр шийдэх үед, миний хийж чадах зүйл тун чухал бөгөөд нэн шаардлагатай байгааг олж мэдээд ихэд гайхсан. Үнэндээ хэн ч намайг авьяасгүй эсвэл чадваргүй гэж харж байгаагүй, тэр дундаа Бурхан. Гэсэн хэдий ч, би амьдралынхаа турш Бурханы Үгийн үнэнээс илүү толгойд минь бодогдох худал хуурмаг зүйлд илүү ач холбогдол өгсөн байсан. 

Мосе ч гэсэн чадвар дутуу байх талаар мэддэг байв. Египетээс гарсан номд Бурхан Мосег хэрэглэн Израильчуудыг Египетийн боолчлолоос чөлөөлж, зуун зууны турш дагаж мөрдсөн Иудейчүүдийн хуулийг тэдэнд өгсөн юм. Мосе бол Израилийн түүхэн дэх хамгийн чухал удирдагчдын нэг байсан ч, Бурхан түүнийг энэ зорилгын төлөө дуудах үед, Мосе энэ ажлыг хийж чадна гэдэгт ердөө ч итгээгүй юм. Бурхан түүнтэй хамт байхаа амласан боловч Мосе өөрийгөө хангалттай сайн биш гэж хэлээд өөр хэн нэгнийг илгээхийг Бурханаас гуйдаг. Түр хүлээгээд энэ талаар бодоод үзээрэй. Мосе цаг хугацаанд баригддаггүй, бүх зүйлийг мэддэг, бүхнийг чадагч, өөрийг нь хэрэглэхийг хүсэж байгаа Бурхантай ярьж байлаа. Мосед итгэл байхад л хангалттай байв. Гэсэн ч, бид үүнтэй адил зүйлийг хичнээн олон удаа хийдэг билээ дээ?

Яг одоо та зорилгодоо эргэлзэж, эсвэл хийх гэж байгаа зүйлээ хийж чадахгүй байгаа мэт санагдаж байж магадгүй. Гэхдээ, чамд онцгой бэлгүүд ба бэлэг авьяас байгаа гэсэн Бурханы Үгэнд итгээрэй. Магадгүй та өөрийнхөө бэлгүүдийг хэн нэгнийхтэй харьцуулахад юу ч биш юм шиг санагдсанаас болоод мэдээгүй ч юм уу, эсвэл байж л байдаг болохоор тоодоггүй байж болох юм. Үнэндээ, танд аяндаа ирдэг зүйл бол хүн бүрийн хийж чадах зүйл биш юм. Таны хийж чадах зүйл бол онцгой бөгөөд та Бурханы төлөвлөгөөнд тун чухал үүрэг гүйцэтгэх ёстой байдаг юм. Түүнээс энэ юу болохыг асуугаарай.

Хэрэв та Бурханы дуу хоолойг хэрхэн сонсохоо мэдэхгүй байгаа бол Түүнийг илүү сайн таньж мэдээрэй. Түүний Үг болох Библийг өдөр бүр унш. Түүнийг сонсож мөн Түүнтэй ярьснаар залбирлын амьдралаа илүү хүчирхэгээр хөгжүүл. Христийн дүр төрхийг тусган харуулдаг хүмүүсээр өөрийгөө хүрээлүүл. Бурхантай дотно харилцаа тогтоохын төлөө ажиллаарай, тун удалгүй, Бурхан таныг дуудах үед дуу хоолойг нь ялгаж чаддаг болох болно. 

Хүлээх зуураа төөрсөн мэт санагдвал Бурханыг сонсоход анхаарлаа төвлөрүүлээрэй. Таны талаар юу хэлж байгааг олж мэд. Түүнээс худал хуурмаг зүйл буйг олж илрүүлэхэд туслахыг хүс, ингэснээр та тэдгээрээс салах болох юм. Жижиг зүйлд хэрхэн дуулгавартай байж дадлагажуулах талаар бод, тэгвэл Тэр танд илүү ихийг илчлэх явцад бэлэн байх болно. Та Түүнээс юуг сайн хийж чадахыгаа харуулахыг хүсээрэй, тэгээд Түүнд байгаа бүхнээ өргөхөд бэлэн бай. Түүнийг хүлээж байх зуураа эдгээр зүйлийг хий, учир нь ихэнхдээ бидний зорилго нь сайн дураар бууж өгөх ба сонсохтой яг хамт байдаг юм. 

Бурхан минь, зөвхөн надад зориулсан тодорхой зорилгын төлөө талархъя. Таны нүдээр өөрийгөө олж харж, намайг унагаахыг оролдох бүх худал хуурмагийг хаяхад надад туслаач. Би Таны дүр төрхөөр аймшигтай болоод гайхамшигтайгаар бүтээгдсэн бөгөөд над шиг өөр хэн ч байхгүй гэдэгт итгэхэд минь туслаач. Надад зориулсан зорилгынхоо төлөө намайг үргэлжлүүлэн бэлтгэн цэвэрлээрэй. Тантай илүү ойртоход туслах дараагийн алхмыг надад харуулан мөн Таны Чуулганд надад зөвшөөрсөн орон зайг дүүргэхэд туслаарай. Есүсийн нэрээр, амен.