វគ្គសិក្សាត្រៀមរៀបអាពាហ៍ពិពាហ៍គំរូ

នៅជាប់នឹងគ្នា

តើឱ្យយើងអាចរក្សាក្ដីស្រឡាញ់របស់យើងឱ្យនៅមានជីវិតរស់រវើក និងស្ថិតស្ថេរជាប់គ្នាក្នុងចំណងអាពាហ៍ពិពាហ៍របស់យើងរហូតទៅ យ៉ាងដូចម្ដេច?

ចូរចំណាយពេលរួមជាមួយគ្នា

ការរក្សាឱ្យក្ដីស្រឡាញ់នៅរស់រវើក នោះវាជាជម្រើសរើសដែលមានការប្រិតប្រៀងនិងប្រឹងប្រែងទុកជាមុន។ វាមានរួមទាំង៖

• ការដាក់ទុនទៅក្នុងមិត្តភាពដោយបន្តធ្វើអ្វីដែលអ្នកទាំងពីរចូលចិត្តធ្វើរួមជាមួយនឹងគ្នា


• បង្កើតទម្លាប់ជាប្រចាំថ្ងៃ ក្នុងការនៅជាប់នឹងគ្នាទៅវិញទៅមក តាមរយៈពាក្យសម្ដីនិងតាមផ្លូវអារម្មណ៍


• រៀបចំមានការទៅចែចង់គ្នាជារៀងរាល់សប្ដាហ៍ ជាមួយនឹងដៃគូរបស់ខ្លួន ដើម្បីឱ្យមនោសញ្ចេតនារវាងគ្នានឹងគ្នា នៅមាន ពេញដោយភាពរីករាយ ហើយក្ដីស្រឡាញ់បន្តកើនឡើងរវាងអ្នកទាំងពីរ។

ចូររុករកមើលពីតម្រូវការខាងអារម្មណ៍របស់ដៃគូរបស់អ្នក

ការរកឃើញពីអារម្មណ៍ដែលនាំឱ្យដៃគូរបស់អ្នកទទួលបាននូវក្ដីស្រឡាញ់ នោះនឹងកសាងនូវការទាក់ទងយ៉ាងជ្រាលជ្រៅរវាងរូបអ្នកទាំងពីរ ហើយវានឹងអាចឱ្យអ្នកស្រឡាញ់គ្នាដោយមានប្រសិទ្ធភាពផង។ យើងម្នាក់ៗអាចមានលក្ខណៈខុសប្លែក ផ្សេងៗពីគ្នា ក្នុងរបៀបដែលយើងផ្ដល់ និងទទួលពីសេចក្ដីស្រឡាញ់។

ភាសានៃក្ដីស្រឡាញ់ទាំង ៥

1. ពាក្យពេចន៍គួរឱ្យស្រឡាញ់


2. អំណោយដែលចេះគិតគូរ


3. ការបង្ហាញក្ដីស្រឡាញ់តាមរូបកាយ


4. ពេលវេលាមានតម្លៃ


5. សកម្មភាពនៃចិត្តល្អ

របៀបទាំង ៥ នៃការបង្ហាញពីក្ដីស្រឡាញ់ សុទ្ធតែសំខាន់ នៅក្នុងគ្រប់ចំណងអាពាហ៍ពិពាហ៍ ប៉ុន្តែជាធម្មតានឹងមាន មួយ ឬពីរ របៀប ដែលបង្ហាញឱ្យដឹងពីក្ដីស្រឡាញ់ក្នុងរបៀបដែលយើងយល់ដឹងជាក់ និងចូលចិត្តទទួលពីរបៀបទាំងនោះ។

បន្ទាប់ពីអ្នកបានបញ្ចប់នូវគម្រោងអានប្រចាំថ្ងៃនេះរួច សូមចូលទៅមើល គេហទំព័រ www.5lovelanguages.com រួចបំពេញនូវកម្រងសំណួរខ្លីមួយ ដើម្បីបញ្ជាក់ពីលំដាប់លំដោយនៃភាសានៃក្ដីស្រឡាញ់របស់អ្នក តាមតែអ្នកគិតថារបៀបណាវាសំខាន់ជាង (តាមថ្នាក់) សម្រាប់អ្នក។ 

សេចក្ដីបង្រៀនលើភាសានៃក្ដីស្រឡាញ់ទាំង ៥ នោះជាមេរៀនដកស្រង់ពី លោកបណ្ឌិត ហ្គេរី ឆាបមេន (Dr. Gary Chapman) ក្នុងសៀវភៅដែលបានលក់ដាច់ជាងគេ ក្រោមចំណងជើងថា "ភាសានៃក្ដីស្រឡាញ់ទាំង ៥៖ អាថ៌កំបាំងនៃក្ដីស្រឡាញ់ដែលនាំឱ្យស្ថិតស្ថេរ" បោះពុម្ពនៅឆ្នាំ ២០១៥ ដោយរោងពុម្ព Northfield Publishing ។ បានប្រើប្រាស់ដោយមានការអនុញ្ញាត។

របៀបកសាងទំនាក់ទំនងខាងការរួមភេទយ៉ាងល្អ

ការរួមភេទផ្សាភ្ជាប់អ្នកទាំងពីរ​រួមគ្នា មិនមែនគ្រាន់តែខាងផ្លូវរូបកាយ ប៉ុន្តែខាងផ្លូវអារម្មណ៍ ផ្លូវចិត្ដ ហើយសូម្បីតែខាងវិញ្ញាណផង។

របៀបក្នុងការបង្កើតនិងថែរក្សាឱ្យមានគន្លងរួមភេទដែលមានសុខភាពល្អក្នុងចំណងអាពាហ៍ពិពាហ៍របស់អ្នក៖

១. រៀបចិត្តរបស់អ្នកឱ្យស្របនឹងគ្នា

ចូរត្រៀមនិយាយឱ្យយល់ពីគ្នា

• ការនិយាយពីការរួមភេទអាចតម្រូវឱ្យមានសេចក្ដីក្លាហាន ក្នុងខណៈថាវាតម្រូវឱ្យយើងត្រៀមដាក់ចិត្ត ដោយក្ដីស្មោះត្រង់ចំពោះគ្នា។


• ចូរប្រាប់ដល់គ្នា ថាអ្វីដែលនាំឱ្យដៃគូរបស់អ្នកទទួលបានអារម្មណ៍ និងអ្វីដែលធ្វើឱ្យអ្នកបាត់អារម្មណ៍ ក្នុងចំណង់ផ្លូវភេទ។

បិទទំព័រនៃទំនាក់ទំនងផ្លូវភេទចាស់ៗចោល

• ទំនាក់ទំនងចាស់ៗ អាចបង្កឱ្យមានភាពច្រណែន ប្រចណ្ឌ និងការមិនទុកចិត្ដ


• ប្រសិនបើអាច ចូរផ្ដាច់ទំនាក់ទំនងក្នុងបណ្ដាញសង្គមពីមនុស្សដែលអ្នកធ្លាប់មានអារម្មណ៍ចំពោះគេ ហើយលុបចោលអ៊ីមែល / សារក្នុងទូរស័ព្ទ / រូបភាពនានា

២. រៀបចិត្តគំនិតរបស់អ្នកឱ្យត្រង់

ការរួមភេទដ៏ល្អ នោះវាអាស្រ័យទៅលើស្ថានភាពនៃគំនិតរបស់យើង

• ចូរបំពេញគំនិតរបស់អ្នកជាមួយអ្វីៗដែលស្រស់បំព្រង គួរឱ្យគោរព និងផ្ដល់កិត្តិយសរួមដល់គ្នា ក្នុងចំណង់ផ្លូវភេទ


• ចូរនិយាយប្រាប់គ្នាពីការរំពឹងនិងសេចក្ដីភ័យខ្លាចទាំងឡាយណា ដែលអ្នកអាចមានជុំវិញការរួមភេទ

បញ្ហានានាដែលជាលទ្ធផលនៃការរំលោភបំពាន ឬវិបត្តិរោគចិត្តនៃរឿងផ្លូវភេទ ពីអតីតកាល អាចតម្រូវឱ្យអ្នកទៅស្វែងរកជំនួយពីអ្នកជំនាញ។

ប្រសិនបើការលោភមើលរឿងអាសអាភាស ជាបញ្ហានៅក្នុងទំនាក់ទំនងរបស់អ្នក ចូរឱ្យអ្នកមានការនិយាយគ្នា ដោយភាពទៀងត្រង់ និងមិនវិនិច្ឆ័យទោស ជាមួយដៃគូរបស់អ្នក។ ការហ៊ានបោះជំហាននានាទៅរកការផ្លាស់ប្រែពីទម្លាប់របស់អ្នក នឹងនាំឱ្យមានឥទ្ធិពលវិជ្ជមានយ៉ាងខ្លាំងក្លា ទៅលើទំនាក់ទំនងរបស់អ្នក ហើយវានឹងជួយឱ្យអ្នកមានការរួមភេទយ៉ាងល្អ ហើយពិត នៅក្នុងចំណងអាពាហ៍ពិពាហ៍របស់អ្នក។

ការមិនឱ្យតម្លៃខ្លួនឯង និងការគិតមិនគាប់គួរចំពោះរូបកាយរបស់ខ្លួន នោះប៉ះពាល់ទៅលើការយល់ដឹងនិងការឆ្លើយតបក្នុងរឿងស្នេហា បែបតាមការរួមភេទរបស់យើង។

• ចូរកសាងនូវទំនុកចិត្តរបស់ដៃគូរបស់អ្នក ដោយហ៊ានប្រាប់គាត់ពីភាពស្រស់ស្អាត និងភាពគួរឱ្យទាក់ទាញរបស់គាត់ ចំពោះរូបអ្នក។


• បន្តលើកសរសើរពីរូបកាយរបស់គ្នាទៅវិញទៅមក ដូចម្ចាស់ស្នេហ៍ គេថ្លែងទៅកាន់គ្នាម្ដងហើយម្ដងទៀត នៅក្នុងកណ្ឌគម្ពីរ បទចម្រៀងសាឡូម៉ូន។

៣. ត្រៀមរូបកាយរបស់អ្នកឱ្យហើយ

មាននូវភាពខុសប្លែកគ្នារវាងបុរសហើយនិងស្រ្តីក្នុងការដាស់អារម្មណ៍ខាងចំណង់ផ្លូវភេទ។

• ចូរស្វែងយល់ដោយការអាន និងការនិយាយប្រាប់គ្នា ពីអ្វីៗដែលនាំឱ្យដៃគូរបស់អ្នកទទួលបានការដាស់អារម្មណ៍។


• ផ្ដល់ពេលវេលាល្មមគ្រប់គ្រាន់ សម្រាប់ការរៀបចំ និងការដាស់អារម្មណ៍ក្នុងពេលអ្នករួមភេទ។

បង្កើតបរិយាកាសនៃភាពទុកចិត្ត។

• ការរួមភេទល្អនោះអាស្រ័យទៅលើការអនុញ្ញាតឱ្យផ្នែកដទៃផ្សេងទៀតនៃទំនាក់ទំនងរបស់អ្នក ទទួលបានការអភិវឌ្ឍន៍។


• មានការជាប់ទាក់ទងដ៏ជ្រាលជ្រៅមួយ រវាងការផ្ដល់ខ្លួនរបស់យើងទៅដល់គ្នាទៅវិញទៅមក តាមរយៈសម្បថនៃចំណងអាពាហ៍ពិពាហ៍ ហើយផ្ដល់ខ្លួនយើងនៅក្នុងទំនាក់ទំនងនៃការរួមភេទ។


• ចូរហាត់ចិត្តឱ្យចេះគ្រប់គ្រងលើខ្លួនឯង – នេះជារឿងសំខាន់នៅពេលណាដែលយើងរកឃើញថាខ្លួន មានការទាក់ទាញទៅរកនរណាម្នាក់មួយផ្សេងទៀត ដែលមិនមែនជាដៃគូរបស់ខ្លួន។