Blwyddyn Newydd: Dechrau NewyddSampl

Byw gyda Pherthynas Newydd ag eraill

Un realiti mwyaf sylfaenol mewn bywyd yw ein bod yn cael ein gorfodi i gael perthynas ag eraill. O'r dechrau cyntaf, pan ddwedodd Duw, " Dydy e ddim yn beth da i'r dyn fod ar ei ben ei hun," y mae arwyddocâd dwys perthnasau dynol wedi bod yn amlwg. Mae Gair Duw yn disgrifio credinwyr Cristnogol fel "Corff Crist." Mae’n dweud ein bod ni’n gysylltiedig â’n gilydd ac yn ddibynnol ar ein gilydd. Cawsom ein gwneud i fod mewn cymuned a gweithredu orau pan fydd ein perthnasoedd yn gytûn. Gan fod perthnasoedd mor sylfaenol i'n bodolaeth, bydd ansawdd y berthynas honno'n cael effaith aruthrol ar ansawdd ein bywydau.

Os yw ein perthynas yn dda, mae ein bywydau yn dda, waeth pa mor anodd yw'r amgylchiadau y gallwn fod ynddyn nhw ar unrhyw adeg benodol. Dyma bŵer ac arwyddocâd perthnasoedd da yn ein bywydau.

Yn anffodus, mae hwn yn rhan o fywyd lle rydyn ni'n aml yn stryglo. Mae'r rhan fwyaf ohonom wedi cael perthnasoedd sydd wedi chwalu yn ein bywydau. Mae'r rhain yn achosi poen i ni, ac mae'r emosiynau sy'n gysylltiedig â'r perthnasoedd hyn yn effeithio ar bob agwedd ar ein bywydau. Mae'n anodd mwynhau hyd yn oed y pethau gorau os bydd ein perthynas â pobl yn torri. Mae ymdrechion i "drwsio" ein perthnasau toredig yn cael eu rhoi ar ein rhestrau Addunedau Blwyddyn Newydd, flwyddyn ar ôl blwyddyn ar ôl blwyddyn.

Mae ein perthnasoedd yn gallu bod yn wahanol. Mae gynnon ni’r posibilrwydd gwirioneddol o berthynas newydd oherwydd, trwy Grist, mae gynnon ni galon newydd. Yn Iesu, mae gynnon ni fywyd newydd, agwedd newydd, a mynediad newydd at yr un a all ein helpu yn ein perthnasoedd. Mae e’n ein galw i fyw mewn cariad â’n gilydd, ac mae Duw bob amser yn rhoi’r gras a’r nerth inni wneud yr hyn y mae wedi ein galw i’w wneud.

Dwedodd Iesu mai’r Gorchymyn Mwyaf oedd “caru Duw â’n holl galon, enaid, meddwl, a nerth.” Yna dilynodd trwy ddweud bod ail orchymyn fel y cyntaf: "Dylen ni garu ein cymydog fel ni ein hunain." Cysylltodd Iesu'r ddwy agwedd hyn ar berthnasoedd; caru Duw â phawb ydym ni a charu eraill â chariad sy'n eu gosod nhw a'u hanghenion yn gyfartal â'n rhai ni. Mae'r cysylltiad hwn yn hollbwysig oherwydd dim ond trwy'r cyntaf y mae'r ail yn bosibl.

Fel Cristnogion sy’n caru Duw â phopeth ydyn ni, dŷn ni mewn sefyllfa i fyw yn y cariad a’r derbyniad dŷn ni wedi’i dderbyn gan Dduw. Mae'r Beibl yn dweud, "dŷn ni'n caru, oherwydd ei fod e wedi ein caru ni yn gyntaf\." Gallwn garu eraill mewn ffyrdd na allem byth eu gwneud ar wahân i Grist.

Dywedodd Iesu wrth ei ddisgyblion ei fod yn rhoi gorchymyn newydd iddyn nhw, “Caru ei gilydd fel dw i wedi eich caru chi.” Oherwydd ein bod wedi profi cariad mor radical, diamod gan Dduw, mae gennym gronfa o gariad i'w chyfeirio at eraill. Gallwn gynnig cariad i'r rhai sy'n anodd eu caru, hyd yn oed os ydyn nhw'n elynion i ni, neu'n anodd eu caru.

Nid yn ein galluoedd naturiol ein hunain, ond drwy Grist, gallwn gynnig y cariad gawsom ni. Bydd hyn yn trawsnewid ein perthnasoedd, hyd yn oed os yw'r person arall yn gwrthsefyll y cariad dŷn ni'n ei ddangos. Pan dŷn ni'n maddau, yn caru, ac mewn heddwch, mae ein perthynas ag eraill yn cael ei drawsnewid, waeth beth fo'u hymateb nhw. Y cynnig hwn o gariad yw gobaith gorau cymod. Eto i gyd, p'un a yw hynny'n digwydd ai peidio, byddwn yn profi rhyddid sy'n rhoi bywyd.

Gwna eleni'r flwyddyn orau erioed. Blwyddyn pan fyddi di'n cerdded mewn cariad trwy gynnig y cariad diamod ges di gan Iesu i eraill!

Os wnest di fwynhau’r cynllun darllen hwn, dŷn ni’n dy wahodd i gysylltu ag ILI a darganfod sut y gelli dyfu fel arweinydd a chyflymu lledaeniad yr Efengyl. Am ragor o wybodaeth, dos i https://iliteam.org/connect.