Найважнейшае рашэньне ў вашым жыцьці!Узор

«Бог стварыў вас зь вечнасьцю ў сэрцы»

Калі Бог стварыў нас, то Ён заплянаваў дзеля нас больш за проста 70-80 гадоў жыцьця. Ён мае канкрэтнае прызначэньне для кожнага з нас. Ягоны плян ахапляе як нашае зямное жыцьцё, так і нашае нябеснае (альбо вечнае) жыцьцё. Якава 4:14 апісвае розьніцу паміж гэтымі двума бакамі нашага існаваньня:

«Бо што такое жыцьцё вашае? Пара, якая зьяўляецца на малы час, а потым зьнікае». Якава 4:14

Вы, пэўна, чулі выраз: «Жыцьцё кароткае». У параўнаньні зь вечнасьцю яно сапраўды кароткае! Біблія кажа:

«І як усім людзям вызначана адзін раз памерці, а пасьля гэтага – суд». Габрэяў 9:27

Усе мы без выключэньня памрэм фізычна. Але фізычная сьмерць азначае канец нашых фізычных целаў, але ня нашых душаў. Нашая душа (альбо нашае сьведамае існаваньне, што жыве ў нашым целе) зьяўляецца вечнай. Пасьля фізычнае сьмерці нашыя душы правядуць усю вечнасьць у адным з двух месцаў: Неба альбо Пекла.

Неба – гэта вечны рай, дзе жыве Бог.

Пекла – гэта поўнае аддзяленьне ад Бога.

Нашае натуральнае нараджэньне ў гэты сьвет было ня толькі пачаткам нашага часовага, фізычнага жыцьця на зямлі, але й нашага духоўнага жыцьця тут і далей праз усю вечнасьць. У сьвятле вечнасьці некаторыя людзі могуць палічыць, што зямное жыцьцё зьяўляецца малаважным, але тое ня ёсьць праўдай. Насамрэч, ваш вечны лёс вызначаецца рашэньнямі, якія вы прымаеце пакуль жывяце на гэтае зямлі; найважнейшае рашэньне – гэта рашэньне зрабіць Ісуса Хрыста Госпадам вашага жыцьця. Збаўленьне робіцца даступным нам праз Ісуса Хрыста, і празь Яго аднога мы можам зьмяніць наш лёс з поўнага аддзяленьня ад Бога на ўсю вечнасьць на вечнае жыцьцё з Богам на Небе. Ісус сказаў:

«Я ёсьць шлях, і праўда, і жыцьцё. Ніхто не прыходзіць да Айца, калі не праз Мяне». Яна 14:6

Рашэньні, якія мы прымаем, пакуль жывем на гэтае зямлі, таксама зьяўляюцца важнымі зь іншых прычынаў. Тое, як мы жывем як вернікі, можа паўплываць на вечны лёс іншых людзей, якія яшчэ ня ведаюць Ісуса Хрыста, як Збаўцу. Штодня людзі навокал нас бачаць наш прыклад жыцьця дзеля Хрыста. Бог выкарыстоўвае кожнага верніка, каб прывесьці да Небёсаў тых, хто яшчэ Яго ня ведае. Ісус сказаў:

«Вы – сьвятло сьвету… Гэтак няхай сьвятло вашае сьвеціць перад людзьмі, каб яны бачылі вашыя добрыя справы і славілі Айца вашага, Які ў небе». Мацьвея 5:14-16