Jesus, Ek Het U NodigVoorbeeld

GEBED:



Jesus, ek het U nodig! U is my Here, my God, my Koning. U is al my aanbidding waardig. Help my, deur u genade, om U te ken en so diep en innig lief te hê, dat die dinge van hierdie wêreld sal vervaag en mettertyd verdwyn.



Ek wil U en slegs U aanbid. Ek wil nie deur kultuur gevorm word nie. Ek is in U en ek wil een met U wees. Bind my hart aan u hart en plaas u waarheid diep binne my. Nie net wil ek U en u Woord ken nie, ek wil ook die begeerte hê om die sonde te versaak en U en u Woord te volg. Lei my om U in gees en in waarheid te kan loof.



Ek het u krag, genade en liefde nodig, sodat ongeag wat die lewe na my kant toe bring, ek elke situasie, persoon en beproewing sal hanteer soos wat U sou — alles tot u eer. Ek wil nie net bloot uiterlik reageer nie, maar eerder van binne af, vanuit die rivier van lewende water. Ek wil so naby aan U wees, Jesus, dat u Gees voortvloei uit alles wat ek doen en sê. Mag ek al my geluk in U vind.



Mag ek U verheerlik in alles wat ek sê en doen (Psalm 42:1-2a; Galasiërs 2:20).



Dit maak nie saak waar ek is, wat ek doen, watter Skrif ek lees, of watter lied ek sing nie, ek wil my gedagtes, my energie en my hart op U en nie op my en my omstandighede gefokus hou nie. Ek soek na U en U alleen.



Maak nie saak of ek:



slaag of misluk,



wen of verloor,



ryk of arm is,



ingesluit of uitgesluit is,



bekend is of vergeet word nie,



mag ek tevrede wees in die wete dat U myne is, en dat ek aan U behoort.



Mag my hoofdoel wees om U lief te hê en deur U liefgehê te word, om U tevrede te stel en U te dien. Help my om my sonde te sien, te betreur en te versaak, deur u genade. Help my om honger en dors te wees na u geregtigheid.



Here Jesus, skenk aan my u genade, barmhartigheid en guns, om my in staat te stel om U te kan sien, U te ken, lief te wees vir U en een te word met U. Dankie dat u Woord (Johannes 14:14) vir my sê: "As julle My iets in my Naam vra, sal Ek dit doen." Amen.