In gesprek met my HereVoorbeeld

Gesprek met God

Daar is min dinge wat meer irriterend is as iemand wat weier om ander mense ’n kans te gee om te praat. ’n Gesprek beteken juis dat daar wedersydse kommunikasie tussen persone sal wees. Gebed mag nooit ’n monoloog wees waar jy alleen aan die woord is nie. Gebed, beweer Rosalind Rinker, die Amerikaanse skrywer wat van die eerste boeke oor gespreksgebed geskryf het, is altyd ’n gesprek tussen twee persone wat mekaar liefhet.

Moeder Teresa, wat in haar leeftyd ’n ware gebedsreus was, het graag haar gebedsgeheim gedeel. Haar geheim is baie eenvoudig, het sy gesê. “Gebed is eenvoudig om met God te praat. Hy praat met óns en ons luister. Ons praat met Hom en Hý luister. Dit is ’n tweerigtingproses: Praat én luister.”

As jy sukkel om te bid, kyk mooi of jou gebede nie dalk — miskien sonder dat jy dit eens agtergekom het — in monoloë ontaard het nie. Leer weer om jou in te stel om na God se stem te luister, vrá Hom om jou te leer luister en ook om vir jou die regte woorde te laat gebruik. Eers nadat jy fyn geluister het, kan jy Hom antwoord met jou gebede.

Hemelse Vader, ek sien nou dat my gebede nie gesprekke was nie. Vergewe my, asseblief. Leer my opnuut om na u stem te luister en U met my gebede te antwoord. Amen.