Soma Biblia Kila Siku Disemba/2022Mfano

Ninyi mnasema kwamba mimi natoa pepo kwa Beelzebuli (m.18). ‘Beelzebuli’ kwa jina jingine ni Shetani au Ibilisi. Yesu husisitiza kwamba Shetani hawezi kumtoa Shetani maana hataki kujiharibu mwenyewe. Watanzania wengi hufikiri kwamba waganga wa kienyeji wanaweza kuwaponya watu wenye mapepo. Lakini si kweli. Maana wao nao katika kazi yao hutumia nguvu ya Shetani. Wanatambua madai ya mapepo na wanajaribu kupunguza usumbufu wao kwa dawa fulani k.m. ubani. Ila kuwatoa hawawezi. Bali Yesu anaweza! Kumbuka anavyosema, Ikiwa mimi natoa pepo kwa kidole cha Mungu, basi ufalme wa Mungu umekwisha kuwajilia. Mtu mwenye nguvu aliyejifunga silaha zake, alindapo nyumba yake, vitu vyake vi salama; lakini mtu mwenye nguvu kuliko yeye atakapomwendea na kumshinda, amnyang'anya silaha zake zote alizokuwa akizitegemea, na kuyagawanya mateka yake (m.20-22). Umkimbilie Yesu!