Soma Biblia Kila Siku Disemba/2022Mfano

Kwa mifano yake Yesu anataka kutupa msukumo wa kuomba kwa ujasiri na bila kuchoka. Yesu ametupa haki ya kumwita Mungu kwa neno ‘Baba’, kwa maana wote waliompokea aliwapa uwezo wa kufanyika watoto wa Mungu, ndio wale waliaminio jina lake (Yn 1:12). Na Mungu ni baba mkamilifu. Katika m.9 Yesu ametupa ahadi kuhusu maombi, akisema, Ombeni, nanyi mtapewa. Na ili tusiwe na mashaka anairudia tena katika m.10 akisema, Kila aombaye hupokea! Yaani si utani. Kuna mambo kweli yatatendeka tukiitumia ahadi yake. Na tukiacha kuitumia, tukiacha kuomba, tutakosa baraka alizokusudia kutupa katika maisha yetu na katika usharika wetu. Na tusiombe mambo ya kimwili tu, lakini zaidi sana tuombe baraka za kiroho kama ilivyo katika ahadi yake anaposema, Ikiwa ninyi mlio waovu mnajua kuwapa watoto wenu vipawa vyema, je! Baba aliye mbinguni hatazidi sana kuwapa Roho Mtakatifu hao wamwombao? (m.13)!