មាគ៌ាពិតនៃព្រះទៅកាន់ភាពជោគជ័យគំរូ

នៅក្នុងអាណាចក្រខាងឯវិញ្ញាណ ភាពជោគជ័យគឺបានរកឃើញនៅក្នុងការបំពេញគោលបំណងនៃព្រះ ដែលព្រះអង្គមានសម្រាប់ជីវិតរបស់អ្នក។ នេះហើយគឺជានិយមន័យនៃភាពជោគជ័យ ដោយយោងតាមព្រះបន្ទូលព្រះ ចែងក្នុងព្រះគម្ពីរ។ នៅក្នុងវប្បធម៌សង្គមរបស់យើងនាសព្វថ្ងៃនេះ គេមានសេចក្ដីពន្យល់បរិយាយខុសឆ្គងយ៉ាងច្រើន ទៅលើអត្ថន័យនៃភាពជោគជ័យ។ មានមនុស្សខ្លះគេសន្មិដ្ឋានថាភាពជោគជ័យ នោះគឺស្មើទៅនឹងបរិមាណប្រាក់ដែលនរណាម្នាក់មាន។ អ្នកខ្លះទៀតគេយោងវាទៅលើកម្រិតកាំនៃឋានៈក្នុងមុខតំណែងការងារដែលគេបានឡើងទៅដល់។ សព្វថ្ងៃ ប្រហែលអត្ថន័យរបស់វា នោះគឺគេឱ្យន័យ ទៅលើចំនួនមនុស្សតាមដាន ដែលគេមាននៅលើប្រព័ន្ធបណ្ដាញសង្គម។ ប៉ុន្តែបញ្ហាចំពោះការសន្និដ្ឋានអស់ទាំងនេះ នោះគឺថា គេពុំបានយោងអត្ថន័យទាំងឡាយ ដោយផ្អែកទៅលើស្តង់ដារនៃភាពជោគជ័យរបស់ព្រះទេ។

ព្រះយេស៊ូវបានប្រទាននិយមន័យនៃភាពជោគជ័យដល់យើង នៅពេលដែលព្រះអង្គមានព្រះបន្ទូលយ៉ាងដូច្នេះ៖ «ទូល​បង្គំ​បាន​លើក​តម្កើង​ព្រះ‌អង្គ​នៅ​ផែនដី ដោយ​បាន​បង្ហើយ​កិច្ច‌ការដែល​ព្រះ‌អង្គ​ប្រគល់​ឲ្យ​ទូល​បង្គំ​ធ្វើ​» (យ៉ូហាន ១៧៖៤)។

សាវ័ក ប៉ុល បានថ្លែងដូចគ្នា នៅក្នុងរបៀបមួយផ្សេងនៅពេលដែលគាត់បានកត់ត្រាពាក្យពេចន៍ទាំងនេះ៖ «ខ្ញុំ​បាន​តយុទ្ធ​យ៉ាង​ល្អ ខ្ញុំ​បាន​បញ្ចប់​ការ​រត់​ប្រណាំង​របស់​ខ្ញុំ ហើយ​ខ្ញុំ​នៅ​តែ​រក្សា​ជំនឿ​ជាប់​ដដែល» (២ ធីម៉ូថេ ៤៖៧)។

ជាការពិត ព្រះបានប្រាប់ដល់ លោក យ៉ូស្វេ ថាភាពជោគជ័យរបស់គាត់ នោះគឺផ្អែកទាំងស្រុងទៅលើការសញ្ជឹងគិតដោយប្រុងប្រយ័ត្នទៅលើព្រះបន្ទូលព្រះ ដោយរួមទាំងការតម្រឹមនូវការសម្រេចចិត្តនិងទង្វើរបស់គាត់ តាមព្រះបន្ទូលព្រះ (យ៉ូស្វេ ១៖៨)។ ភាពជោគជ័យមានបញ្ចូលរួមទាំងការបំពេញនូវរាល់អ្វីៗដែលព្រះបានត្រាស់ហៅអ្នកឱ្យធ្វើ។

តើអ្នកឱ្យនិយមន័យ ដោយខ្លួនផ្ទាល់ ចំពោះភាពជោគជ័យ ថាយ៉ាងម៉េចដែរ?

តើនិយមន័យនេះ វាប្រៀបទៅនឹងនិយមន័យរបស់ព្រះ ដែរឬយ៉ាងណា?