Jɔn 5
5
1Ɣɔn ne kaake cok ke miɛth diit de Judai ee tɔ; go Yecu lɔ Jeruthalem.
2Ku wɛr atɔ ne thoŋ de amɛl lɔɔm ne Jeruthalem, ye cɔɔl Bethetheda ne thoŋ de Eberu, nɔŋ akuɛɛth keedhiec. 3Ku ci dun diit de kɔc bec taac ne keyic, ku coor, ku ŋot, ku kɔc ci ruai, titki amaŋ de piu. 4Ku malaika kee lɔ piny ku le wɛric ne akol kɔk, ku mɛɛk piu; ku ran ci kan kɛɛc ne piu yic te mɛɛk en piu ee dɛm ebɛn ne benyden ye tɔ ke ye. 5Ku raan ee tɔ, ran ci arɛɛm dɔm ne run keethiɛrdiak ku bɛt. 6Na ci Yecu ye ŋem ke ci tɛc, ku nyic ke ci tɔ ne run juec yela, go yɔɔk, Ye nɔŋ piɔu bi yi cɔk piɔl? 7Go ran bec jam, Ye Bɛny, kacin ran ye ɣa tau ne piu yic te mɛɛke ke: ku te ŋuɔt an ke an bɔ, ke ran dɛ a go dai kɛɛc wɛric ne anom. 8Go Yecu yɔɔk, Ye jɔt rɔt, jɔt agendu, ku cathe. 9Go raan dai dɛm elantoŋtɛi, ku jɔt agende, ku ciɛth.
Ku kee ye akol de thabath. 10Go Judai ran ci dɛm yɔɔk. Yi kaya akol de thabath: yen kace piath ba agendu jɔt. 11Go ke yɔɔk, Ye ran e cɔk ɣa dem, yenekee yook an, Ye jɔt agendu, ku cathe. 12Goki thiec, Yi yeŋa e yook yin, Ye jɔt agendu, ku cathe? 13Ku kakuc ran ci dɛm lan yen ŋa: Yecu ee rɔt liɛp wei ne thiaŋ ci piny thiaŋ ne kɔc. 14Ela ke yok Yecu ne yekalu, go yɔɔk, Ye ŋem, yin ci cɔk piɔl: duɔna kerac ber loi, kɛlke yin bi rac ne rɛɛc war yerɛɛce. 15Go ran lɔ ɣɔu wei ku le Judai yɔɔk ye kee Yecu yenekee cɔk ye piɔl. 16Go Judai goki Yecu ŋet ne ekene, ku nɔŋki piɔth bik nɔk ne ke cen kaake loi ne akol de thabath. 17Go Yecu dhuɔk ke, Ye Awa ee lui agut ci emane, ku an ye lui. 18Go Judai goki piɔth naŋ bi cok nɔk ne ekene, ne ke cen ke rek, dony kol e thabath ku cɔk Nhialic ye Wun, cɔk rɔt cɔk thoŋ ke Nhialic.
19Go Yecu dhuɔk ke jiɛm,
Ye we ya yɔɔk neyic, Ya Wa ace ke dɛ leu ne luɔi ne guɔpde, ee ke ye ŋem ne ye Wun loi abac. Ke dɛ ebɛn ke ye loi, eka loi Wa eya, 20Wun ee Wa nhiar, ku nyuth ke dɛ ebɛn ke ye loi: ku kabi nyuɔth luɔi diit war kaake, bi we gai. 21Acit man ye Wun kɔc ci thou jɔt, ku ye ke cɔk piir, yenekee cɔɔk de Wa eya ben kɔc tɔ ne yepiɔu ya cɔk piir. 22Acin ran ye Wun ke dɛ luk, ee luk ebɛn yiɛn Wa: 23bi raan ebɛn bi Wa ya riɛu ci man rieu ke Wun. Ran ci Wa ye riɛu aci Wun ye riɛu man ci ye tuɔc. 24We ya yɔɔk neyic, Ya ran ye wɛtdie piŋ, ku gɛm en yen man ci a tuɔc, ee naŋ piir athɛɛr, ku kaci ye luɔkwei; ee thou dɛɛny ne piiric. 25We ya yɔɔk neyic, Ya thaa abɔ, ku katɔ emane, bi kɔc ci thou ror de Wen de Nhialic piŋ: ku kɔc ye piŋ aabi ya piir. 26Acit man ye Wun naŋ piir ne rɔt, yenekee cɔɔk cen e yiɛn Wa eya bi ya naŋ piir ne rɔt; 27ku kaci yiɛn riɛr bi luk a luk, ne ke yen Wen de raan. 28Duɔka gɛi ne ekene; thaa abɔ, bi raan ebɛn tɔ ne rɛŋ yic rorde piŋ, 29ku biki bei; ran e ye kepiath loi abi bɛn ne jon de rɔt de piiric, ku ran e ye kerac loi abi bɛn ne jon de rɔt de lukwei.
30An ne guɔpdie acin ke lɛu ne luɔi: ke ya piŋ, yeneka ya luk: ku luŋdie ee lajik; ne ke cen e ke de apiɔu yene ya kɔɔr, ee ya ke de piɔnde yen man ci a tuɔc. 31Na ya duleŋ de rɔt, ke lekdie acie yic. 32Duleŋ lek ne ɣɛn ee dɛ, ku kanyiɛc lekden yen lek ne ɣɛn ee yic. 33We ci tooc enɔŋ Jɔn, ku kee duleŋ de yith. 34Ku lek ca lom acie ke de raan: an ye keekake luel, bi we ben luɔk. 35Yenekee ye ɣɛɛr ye dep ku meer: ku we we ci piɔth naŋ bak piɔth lɔyum ne ɣɛɛrde ɣɔn tɔ we wene yen. 36Ku lek tɔ ke ɣa adit ne lek de Jɔn: luɔi ci Awa yiɛn a ba thol, ee luɔi ya loi, yenekee duleŋ de ɣɛn, ye Awa ci ɣa tuɔc. 37Ku Awa man ci a tuɔc ee duleŋ de ɣɛn. Ee kɛnka kan piŋ ror, ku kɛnka ŋem guɔp. 38Ku kacin wɛtden ceŋ ne weyic: yen man ci tuɔc akɛnka gam. 39We ye kacigɔɔr caar, calka wɔ bak naŋ piir athɛɛr ne keyic: ku keeka ye duleek ke ɣɛn; 40ku we ce bɔ enɔŋ ɣɛn bak naŋ piir. 41An cie naŋ rieu enɔŋ kɔc. 42We yake nyic, kacin nhiɛr de Nhialic ne weyic. 43An ee bɔ ne rin ke Awa, ku we ken ɣa gam: na bɔ dɛ ne rinke ne rɔt, e kabak gam. 44Bak leu ne gam wuɔde, ke we ye roth riɛu ŋɛk ke ŋɛk, ku cakka kor ne rieu ye bɛn enɔŋ Nhialic yetok? 45Duɔka tak wuɔ ba we guɛl Awa; tok atɔ toŋ ye we guɛɛl, Mothe, man ye we roth gɛi. 46Na cak Mothe gam, e kee te cak ɣa gam: ee gɔɔr ne ɣɛn. 47Ku na cak garde ye gam, ke we bi welcie ya gam wuɔde?
Currently Selected:
Jɔn 5: LEKJOT
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society 1940, 2017
Learn More About Lek Jot de Jecu Kritho 1940