Jɔn 4
4
1Na ci Bɛnydit ye nyic ke ci Parithai piŋ ya Yecu aber kɔcpiocke cɔɔl ku yor ke nhiim ci Jɔn, ku wɛr Jɔn, 2(ku yen Yecu ne guɔpde aken kɔc baptith, a kaye kɔcpiocke), 3go jal ne Judaya, ku ber lɔ Galili. 4Ku bii teek ne Thamaria. 5Go lɔ pan de Thamaria cɔl Thukara, thiak ke piny thin ci Jakob yiɛn wende Jothep. 6Ku yinh de Jakob ee tɔ eeti. Yen Yecu ee ci dak ne cathde go nyuc ne yith nom, ku kee ye thaa de dhetem. 7Go tiŋ de Thamaria bɛn bi bi gem ne piu. Go Yecu yɔɔk, Ye cɔk ɣa dek. 8Kɔcpiocke aake ci lɔ bei bik lɔ ɣooc e miɛth. 9Go tiŋ de Thamaria yɔɔk, Ye yeŋo yin a thiɛc piu ke yin ye Juda, ke an ye tiŋ de Thamaria? (Ke Judai cie mat kene kɔc ke Thamaria.) 10Go Yecu gam ku yook, Ye na nyic miɔc de Nhialic, ku nyic ran ye yi yɔɔk, Ye cɔk ɣa dek; ke kee te ca lim, ku kee te ci yi yiɛn piu ye piir. 11Go tiik jam, Ye Bɛny, kacin ke bin ke gem, ku yith amecic; ba keepiu ye piirke ya bɛi teno? 12Ye yin e dit ne Jakob kuarda, man ci wɔ yiɛn yith, ku ye dek thin yen e guɔpde ku mithke ku ɣɔkke? 13Go Yecu bɛr yɔɔk, Ye ran ye dek ne keepiuke abi bɛr ya yal. 14Ku ran ye dek ne piu ban ke ye miɔc aci bi ya yal athɛɛr. Piu bake yiɛn en aabi ya yinh de piu eyic bik ya cil eke ye piir athɛɛr. 15Go tiik yɔɔk, Ye Bɛny, yiɛne ɣɛn keepiuke, duɔke an bi ya yal, ku ca ber ya bɛn etene ba bi gem. 16Go Yecu yɔɔk, Ye lɔ cɔl monydu, ku baka etene. 17Go tiik dhuk ku yook, Ye an cin moc. Go Yecu jam, Ye yin ci jam apiath, jiɛm yin, Wu an cin moc. 18Yin e nɔŋ roor keedhiec; ku ran tɔ ke yin emane acie monydu. Yekene eka cin yic luel. 19Go tiik jam, Ye Bɛny, yin nyiɛc ke yin e nebi. 20Kuarkuɔ ake ye duur ne yekuure, ku we ye jam, Wuɔ kɔc aabi dhiɛl ya lɔ duur Jeruthalem. 21Go Yecu yɔɔk, Ye tiik, ye ɣa gam, kabi bɛn, ke we ci Wun door ne yekuure, ku ne Jeruthalem. 22We ye ke yaka kuc door: wɔ ye ke yeku nyic door. Luak ee ya ke de Judai. 23Ku ke bɛn, a katɔ emane, ke kɔc ye ye door ne yith bi Wun ya door ne wei ku yic: Wun ee kɔc cit ke kɔɔr, bik ye ya door. 24Nhialic ee Wei; ku kɔc ye ye door abik ya door ne wei ku yic. 25Go tiik jam, Ye kanyiɛc Mathia abi bɛn (ye cɔɔl Kritho): na ci bɛn, e kabi wɔ lɛk kaŋ kedhia. 26Go Yecu yɔɔk, Ye an eka jam wɔne yin, an eke yen.
27Na wen ke kɔcpiocke bɔ, ku gɛiki ne ke jiɛm en ke tiik; ku cin ran thiec e, Ye yeŋo kɔr? ka, Yeŋo ye luel we ye? 28Go tiik tonyden de piu nyaŋ wei, ku jiɛl ler bei, ku yook kɔc, 29Ye baka, ŋɛmka ran ci a lɛk kaŋ kedhia ka ca loi thɛɛr agut ci emane. Cie Kritho ekene? 30Goki lɔ biyic baai, biki enɔŋ yen. 31Ne kaam ŋoot kek wei ke lɛŋ kɔcpiocke, jamki, Yi Bɛny, came. 32Go ke yɔɔk, Ye an nɔŋ miɛth ba cam ku kakuɔcka. 33Go kɔcpiocke roth thiec, Ya nɔŋ ran ci e yiɛn ke ciɛm? 34Go Yecu ke yɔɔk, Ye miɛthdie yenekee luɔi de wel ke piɔn de yen man ci a tuɔc, ku bi luɔide thol. 35Cak ye luel, Wuɔ pɛi kaŋoot keeŋuan bene ke rap tem? Ŋɛmka, we ya yɔɔk, Ya jatka wenyin, ku ŋɛmka dum. Kaa guɔ ɣɛɛr bi ke tem. 36Ran ye ke tem aya ariɔp loom, ku ye ka ci luɔk kuɔt nhiim ne piir athɛɛric, bi ran ye pur ku ran ye tem bik piɔth ya miɛt etok. 37Ku yejame kee yic, Ye tok ee pur, ku dɛ ee tem. 38We ca tuɔc ba ka keneke loi lɔ tem. Kɔc kɔk aa lui, ku lɔɔkka roth ne luɔidenic.
39Ku kɔc juec ke kɔc ke Thamaria ke yepane kaa gam ne jam de tiik, yook en ke, Ye kee ɣa lɛk kaŋ kedhia ka cake loi thɛɛr agut ci emane. 40Na wen ci kɔc ke Thamaria bɛn enɔŋ en, ke laŋki bi reer ke ke: go ceŋ thin ne akol keerou. 41Ku kɔc juec kɔk aa gam ne welke; 42ku yookki tiik, Ya wɔ ye gam, ku kacie jamdu; ee piŋ ci wɔ ye piŋ ne gupkuɔ, ku nyicku ke ye Kritho neyic, Duluɛŋ de kɔc kedhia.
43Na ɣɔn ne akol keerou ke jiɛl leer Galili. 44Yecu e guɔpde ee jam, Ye nebi acie riɛu pinyde. 45Na wen ci bɛn Galili, go kɔc ke Galili loor. Aake ci ka cike loi ŋem te de miɛth ne Jeruthalem: aake ci lɔ te de miɛth eya.
46Go Yecu bɛr bɛn Kana de Galili te cen piu waar e ke ye piukeabiɛi. Ku bɛny ee tɔ nɔŋ wenden bec ne Kapernaum. 47Na ci Yecu piŋ ne ci bɛn bei ne Judaya leer Galili, go lɔ enɔŋ en, ku lɔŋ bi bɛn bi wende bi cɔk dem. Ee ci duɔr thou. 48Go Yecu yɔɔk, Ye na kɛnka cit ŋem ku kagɛiyeke, e kacak gam. 49Go bɛny jam, Ye Bɛny, bar, duɔke mɛnhdie bi thou. 50Go Yecu yɔɔk, Ye dhuɔkne tedu: wendu kapiir. Go raan wel cii Yecu ke lɛk e gam ku leer tede. 51Ku na ye ciɛth ye leer bei, go aluɛkke loor, ku yookki, Ya wendu kapiir. 52Go ke thiec ne thaa gɔl en piir. Goki yɔɔk, Ya war ne thaa dherou yenekee jiɛl alɛɛth e eguɔp. 53Go wun nyic ke ye thaa waar yooke Yecu ye, Ye wendu kapiir; ku kee ci gam kene kɔcke kedhia. 54Kaŋ aaya rou, kagɛiyeke ci Yecu ke loi te cen bɛn bei ne Judaya leer Galili.
Currently Selected:
Jɔn 4: LEKJOT
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society 1940, 2017
Learn More About Lek Jot de Jecu Kritho 1940