Ідзі Рабі Кажы Давай: Свабода ў скарэньні ІсусуУзор

Я зраблю тое, што Ты хочаш, каб я зрабіў

Рабіць тое, што хоча Бог, можа спачатку напужаць нас, нібыта мы запрашаем Яго даць нам велічэзны сьпіс рэчаў, якія мы мусім зрабіць, але ніколі ня здолеем. Колькі мы павінны выканаць? Наогул, з чаго пачаць выконваць усе Ісусавы загады?

З эвангельляў зразумела адна рэч: людзі не адносіліся да Ісуса і да фарысэяў аднолькава. Фарысэі рабілі праведнасьць складанай, недасягальнай і, пэўна, непажаданай. У Сваёй Казані на гары Ісус спрасьціў усё, падсумаваўшы ў адным сказе тое, што мы павінны рабіць: “І вось усё, што хочаце, каб рабілі вам людзі, тое і вы рабеце ім; бо ў гэтым закон і прарокі” (Мацея 7:12).

Тое можа выглядаць страшным, але ж паразважайце аб сваім сёньняшнім дні: у той час, як вы будзеце працаваць, вучыцца, дбаць пра сваю сям’ю або выконваць звычайныя штодзённыя абавязкі, вы, напэўна, сустрэнецеся зь людзьмі ўсякага тыпу. Зь іншымі вы скантактуеце ў сацыяльных сетках. Таксама будуць нейкія выпадковыя ўзаемадзеяньні, зьвязаныя з тым, што вы робіце сёньня.

У кожным узаемадзеяньні вашага дня, як бы вы хацелі, каб з вамі абыходзіліся? Выкананьне Ісусавай волі азначае, што вы самі менавіта так і павінны абыходзіцца зь іншымі. Міхея 6:8 дае нам тры практычныя прыклады гэтага: абыходзіцца зь іншымі справядліва й без прадузятасьці, быць ласкавымі да тых, хто жыве ў нястачы і й пакорна хадзіць перад Богам, не ўважаючы сябе важнейшымі або лепшымі за іншых.

Лёгка падумаць, што рабіць тое, што хоча Бог, — гэта нейкае незвычайнае або вельмі цяжкае заданьне, якое трэба выконваць хіба толькі ў крызісную часіну. Але насамрэч — і гэтага вельмі часта не разумеюць — мы мусім рабіць тое, што хоча Ён, проста штодня. Гэтыя маленькія штодзённыя ўчынкі паслушэнства дапамагаюць расьці нашай веры ды адвазе і рыхтуюць нас да паслушэнства ў час большае рызыкі. Гэта можа быць так проста, як трыманьне абяцаньня, асабліва калі тое патрабуе ахвяры або зьяўляецца нязручным.

Ці вы жадаеце папрасіць Бога даць вам сілы й мудрасьці зрабіць тое, што Ён хоча, каб вы зрабілі сёньня? Памалецеся аб кожнай рэчы зь сёньняшняга раскладу й папрасеце Бога даць вам сілы зрабіць тое, што Ён хоча, каб вы зрабілі.