Amos 5:1-27

Mense van Israel, luister na wat ek sê. Ek huil en treur oor julle soos 'n mens treur oor iemand wat dood is: Die mense van Israel het geval, hulle sal nie weer opstaan nie. Hulle het op hulle eie grond geval, en niemand help hulle om op te staan nie. Ja, die Here sê: “Wanneer 1 000 mense van Israel uit 'n stad gaan om oorlog te gaan maak, dan sal 900 sterf. Wanneer 100 manne gaan, dan sal 90 sterf.” Ja, die Here sê vir die mense van Israel: “Julle moet vra wat Ek wil hê julle moet doen, dan sal julle lewe! Julle moenie in die stad Bet-El gaan vra nie, en julle moet ook nie na die stad Gilgal gaan nie. Julle moenie verder gaan na die stad Berseba nie. Die vyande sal die mense van Gilgal vang en na 'n ander land vat en hulle sal Bet-El verwoes.” Vra wat die Here wil hê, dan sal julle lewe! As julle dit nie doen nie, dan sal Hy 'n vuur na julle toe stuur om die Israeliete te brand. Daar sal niemand in Bet-El wees wat die vuur kan doodmaak nie. Julle doen nie reg aan mense nie, julle laat hulle baie swaar kry. Dit is die Here wat die sterre gemaak het, Orion en die Sewe-ster. Hy laat dit lig word ná die nag, Hy laat dit donker word ná die dag. Dit is Hy wat die wolke uit die see bring en wat dit laat reën op die land. Sy Naam is die Here. Die Here maak sterk mense vinnig dood. Hy laat sterk mure omval. Julle haat 'n man wat in die poort praat teen iemand wat verkeerd gedoen het, julle hou nie van 'n man wat die waarheid praat nie. Julle trap op die arm mens, julle vat sy koring. Daarom sal julle nie woon in die huise wat julle gebou het met die klippe wat julle so mooi gekap het nie. Julle sal nie die wyn drink van die mooi wingerde wat julle geplant het nie. Ek weet hoe baie en hoe groot julle sonde is. Julle is vyande van iemand wat reg doen. Julle vat die geld wanneer mense julle wil betaal om verkeerd te doen. In die poort is julle onregverdig met die arm mense. Dit is hoekom verstandige mense stilbly in hierdie tyd. Dit is 'n slegte tyd. Julle sê die Here is by julle. Maar julle moet probeer om goed te doen, moenie doen wat sleg is nie. Dan sal julle lewe, en dan sal die Here, die God wat oor alles regeer, by julle wees. Julle moet haat wat sleg is en julle moet lief wees vir wat goed is, julle moet in die hof reg doen aan mense. Miskien sal die Here, die God wat oor alles regeer, dan jammer wees vir julle, julle Israeliete wat nog lewe. Ja, die Here sê, die God wat oor alles regeer, die Here, sê: “Die mense sal huil en treur op al die oop plekke in die stad, hulle sal in al die strate sug. Hulle betaal mense om te treur, en hulle sal die boere roep om saam te kom treur oor almal wat dood is. Hulle sal in al die wingerde treur, want Ek gaan tussen julle deur om julle te straf.” Dit sê die Here. “Dit sal baie sleg gaan met mense wat wens die dag van die Here moet gou kom. Hoekom wens julle die dag van die Here moet gou kom? Daardie dag sal dit donker wees, daar sal nie lig wees nie. Dit sal wees soos wanneer iemand vir 'n leeu vlug en dan teen 'n beer vasloop, of wanneer iemand in sy huis kom en met sy hand teen die muur druk, en dan is daar 'n slang wat hom byt. Dit sal donker wees op die dag van die Here, dit sal nie lig wees nie. Daardie dag sal swart wees, daar sal niks lig wees nie.” “Ek haat julle feeste, Ek wil nie die feeste hê nie. Ek hou nie van julle gewyde feesdae nie. Julle bring vir My brand-offers en koring-offers, maar Ek wil dit nie hê nie en Ek wil glad nie kyk na die vet diere wat julle bring vir ete-offers nie. Wanneer julle sing, dan is dit nie vir My mooi nie, julle raas net. Hou op sing! Ek wil nie luister wanneer julle musiek maak met 'n harp nie. Ek wil hê julle moet reg doen aan mense. Julle moet aanhou om dit te doen, aanhou soos 'n rivier wat altyd vol is. Mense van Israel, toe julle 40 jaar lank in die woestyn was, het julle nie diere of koring vir My ge-offer nie. Nou sal julle die gode wat julle gemaak het, saam met julle moet dra. Dit is julle ster-gode, julle koning Sikkut, julle afgod Kijun. Die vyande sal julle vang en hulle sal julle wegvat tot ver anderkant die stad Damaskus,” sê die Here. Sy Naam is die Here, God wat oor alles regeer.