KykNET Lent GidsVoorbeeld

Wanneer ek van my eie reis voorraad neem

"Laat julle hele lewe dus vertel van die respek wat julle vir God het. Julle is nie mense wat net vir hierdie wêreld leef en vir wat julle daaruit kan kry nie. Dinge het mos heeltemal vir julle verander"

1 Petrus 1:18 (Die Boodskap).

Wanneer jy op ’n reis gaan, moet jy soms stilhou voordat jy verder kan gaan. Jy maak seker die bagasie op die dak is nog stewig vas en dat die bande nog styf is. Jy gebruik die navigasie-toepassing om te loer of jy nog op koers is.

Aan die einde van elke week in Lydenstyd word jy genooi om ’n hersieningsgebed te doen — dit beteken om weer (her) te sien - dit wat vir jou uitgestaan het, waaraan jy nog wil dink en verder oor wil bid. Om ’n hersieningsgebed te doen beteken nie dat jy dit die eerste keer “verkeerd” gedoen het nie. Dit is eerder om die genademiddele wat die Here vir jou gegee het, die “manna en kwartels”, met dankbaarheid in jou hart vas te maak.

Oefening: Kies een van die dae van die week en dink na oor jou ervaring op hierdie dag. Jy kan ook terugdink aan jou hele week en stilstaan by die oomblikke waar jy dinge beleef het wat vir jou uitstaan en jou bybly. Dalk wil jy ook weer gaan kyk na van die inskrywings in jou joernaal. Praat met die Here daaroor.

Herhaalgebed:

Here, gee my die genade om U in my lewe raak te sien.