Soma Biblia Kila Siku Mei/2022Mfano

Ni wajibu mwema kumshangilia Mungu tunapojaliwa mema. Lakini endapo tuna shida, tuikabili kwa maombi. K.mf. wakati wa kuugua, ni jambo jema kuwashirikisha ndugu na hasa viongozi wa kiroho. Mungu ametoa ahadi kubwa tukiombeana. Tunakumbushwa kwamba,kule kuomba kwa imani kutamwokoa mgonjwa yule, na Bwana atamwinua; hata ikiwa amefanya dhambi, atasamehewa.Hivyo tunashauriwa,Ungameni dhambi zenu ninyi kwa ninyi, na kuombeana, mpate kuponywa. Kuomba kwake mwenye haki kwafaa sana, akiomba kwa bidii(m.15-16). Hata hivyo suala la maombi lahitaji uadilifu mbele za Mungu. Tutegemee ahadi yake ili tusitetereke katika imani, na tuwe watu wa bidii katika maombi, maana Mungu ni mkarimu. Katika Yak 1:5-6 anasema,Mtu wa kwenu akipungukiwa na hekima, na aombe dua kwa Mungu, awapaye wote, kwa ukarimu, wala hakemei; naye atapewa. Ila na aombe kwa imani, pasipo shaka yoyote.Hatimaye tusiache kurejezana kwa upendo, ili kuimarishana kiroho.