Ezekiela 36
36
Ny hitahian’i Jehovah ny tanin’ny Isiraely.
1ARY hianao, ry zanak’olona, maminania amin’ny tendrombohitry ny Isiraely, ka ataovy hoe:
Ry tendrombohitry ny Isiraely,
Mihainoa ny tenin’i Jehovah:
2Izao no lazain’i Jehovah Tompo:
Noho ny nanaovan’ny fahavalo anareo hoe:
Hia! efa lasanay ny havoana fahagola!
3Dia maminania, ka lazao hoe:
Izao no lazain’i Jehovah Tompo:
Noho ny nandravany anareo sy ny nisafoahany nanenjika anareo avy amin’ny tany manodidina,
Ka dia efa lasan’ny jentilisa sisa ho fananany hianareo,
Sady efa nataon’ny molotry ny mpibedibedy fitenenana
Ka efa ambentinteny amin’ny firenena,–
4Dia mihainoa ny tenin’i Jehovah Tompo, ry tendrombohitry ny Isiraely:
Izao no lazain’i Jehovah Tompo amin’ny tendrombohitra sy ny havoana,
Ny lohasahan-driaka sy ny lohasaha
Ary amin’ny korontam-bato sy ny tanànaolo,
Izay efa babo sy fandatsa ho an’ny firenena sisa amin’ny manodidina,–
5Eny, izao no lazain’i Jehovah Tompo:
Tamin’ny afon’ny fahasaro-piaroko no nitenenako tokoa
Namely ny firenena sisa sy Edoma rehetra,
Izay nahalasa ny taniko ho fananany
Tamin’ny hafalian’ny fony tokoa
Sy tamin’ny fanahy mamingavinga, mba hangoronany azy ho babo.
6Koa maminania ny amin’ny tanin’ny Isiraely,
Ka lazao amin’ny tendrombohitra sy ny havoana
Ary ny lohasahan-driaka sy ny lohasaha hoe:
Izao no lazain’i Jehovah Tompo:
(Indro, tamin’ny fahasaro-piaroko sy ny fahatezerako no nitenenako):
Noho ny nitondranareo latsa tamin’ny firenena,
7Dia izao no lazain’i Jehovah Tompo:
Izaho efa nanangan-tànana nanao hoe;
Ny firenena manodidina anareo no hitondra henatra.
8Fa hianareo kosa, ry tendrombohitry ny Isiraely,
Dia hisandrahaka sy hahavokatra ho an’ny Isiraely oloko;
Fa efa antomotra ny hihavian’ireny.
9Fa, indro, hitodika ho aminareo Aho
Ka hanatrika anareo;
Dia hasaina sy hofafazana hianareo,
10Ary hahamaro ny olona eny aminareo Aho,
Dia ny taranak’Isiraely rehetra rehetra,
Ary honenana ny tanàna,
Ka haorina indray ny efa rava;
11Dia hampitombo olona sy biby fiompy eny aminareo Aho,
Ka hitombo sy hiteraka ireo;
Hametrahako mponina tahaka ny taloha any aminareo,
Ary hanisy soa anareo mihoatra noho ny tamin’ny niandohanareo Aho;
Ka dia ho fantatrareo fa Izaho no Jehovah.
12Eny, hampivoivoy olona eny aminareo Aho, dia ny Isiraely oloko;
Dia hanana anareo#36.12 Heb. anao. izy ka hahalasa anareo#36.12 Heb. anao. ho lovany,
Ary tsy hahalany fara azy intsony hianareo.#36.12 Heb. hianao.
13Izao no lazain’i Jehovah Tompo:
Noho ny nanaovany taminareo hoe:
Hianao, ry tany, dia mandany olona,
Sady mahalany fara ny firenenao,
14Dia tsy handany olona intsony hianao,
Na hahalavo ny firenenao intsony, hoy Jehovah Tompo.
15Ary hataoko tsy mahare ny latsan’ny jentilisa intsony hianao
Sady tsy hitondra ny fanaratsian’olona intsony;
Ary tsy hahalavo ny firenenao intsony hianao, hoy Jehovah Tompo.
Ny fifampiankinan’ny famonjena ny Isiraely sy ny fahamasinany.
16ARY tonga tamiko ny tenin’i Jehovah nanao hoe: 17Ry zanak’olona, ny taranak’Isiraely nonina tany amin’ny taniny, dia nandoto izany tamin’ny fanaony#36.17 Heb. làlany. sy tamin’ny asany izy; fa tahaka ny fahalotoan’ny vehivavy mararin’ny fadimbolana no fahalotoan’ny fanaony#36.17 Heb. làlany. eo anatrehako. 18Ka dia naidiko ho aminy ny fahatezerako mirehitra noho ny ra nalatsany teo amin’ny tany sy noho ny nandotoany izany tamin’ny sampiny. 19Ary naeliko ho any amin’ny firenena izy ka nahahaka ho any amin’ny tany samy hafa; araka ny fanaony#36.19 Heb. làlany. sy ny asany no nitsarako azy. 20Ary nony tonga tany amin’ny firenena izay nalehany izy, dia tonga fandotoana ny anarako masina tamin’ny nanaovan’ny olona azy hoe: Ireo no olon’i Jehovah, nefa niala tamin’ny tanin’i Jehovah izy. 21Dia namindrako fo ny anarako masina, izay nolotoin’ny taranak’Isiraely tany amin’ny firenena izay nalehany.
22Koa ataovy amin’ny taranak’Isiraely hoe: Izao no lazain’i Jehovah Tompo: Tsy noho ny aminareo no anaovako izany, ry taranak’Isiraely, fa noho ny anarako, masina, izay nolotoinareo tany amin’ny jentilisa izay nalehanareo. 23Ary hohamasiniko ny anarako lehibe izay efa nolotoinareo tany amin’ny jentilisa, ka dia ho fantany fa Izaho no Jehovah, hoy Jehovah Tompo, rehefa miseho ho masina eo imasony Aho amin’ny ataoko aminareo. 24Fa halaiko avy any amin’ny jentilisa hianareo ary hangoniko avy any amin’ny tany rehetra ka ho entiko ho any amin’ny taninareo. 25Dia hofafazako rano madio hianareo, ka hadio; ny mba ho afaka amin’ny fahalotoanareo rehetra sy ny sampinareo rehetra no hanadiovako anareo. 26Ary homeko fo vaovao hianareo, ary fanahy vaovao no hataoko ao anatinareo, ary hesoriko amin’ny nofonareo ny fo vato, ka homeko fo nofo hianareo. 27Ary ny Fanahiko no hataoko ao anatinareo, ka hahatonga anareo handeha araka ny lalàko sy hitandrina ny fitsipiko ka hanaraka azy. 28Ary honina any amin’ny tany izay nomeko ny razanareo hianareo, ka ho oloko hianareo, ary Izaho ho Andriamanitrareo. 29Ary hovonjeko ho afaka amin’ny fahalotoanareo rehetra hianareo, ary hantsoiko sy hataoko vokatra ny vary, ary tsy hanaterako mosary intsony hianareo; 30ary hataoko vokatra koa ny voankazo sy ny vokatry ny saha, mba tsy ho voalatsan’ny jentilisa amin’ny mosary intsony hianareo.
31Dia hotsarovanareo ny làlan-dratsinareo sy ny fanao tsy metinareo, ka dia haharikoriko anareo ny tenanareo noho ny fahadisoanareo sy ny fahavetavetanareo. 32Tsy noho ny aminareo no anaovako izany, hoy Jehovah Tompo–aoka ho fantatrareo izany; koa menara sy mangaihaiza hianareo noho ny làlanareo, ry taranak’Isiraely.
33Izao no lazain’i Jehovah Tompo: Amin’ny andro hanadiovako anareo ho afaka amin’ny helokareo rehetra dia hametrahako mponina ao amin’ny tanàna, ary haorina indray ny efa rava. 34Ary hasaina ny tany efa lao, fa tsy ho lao eo imason’ny mpandalo rehetra intsony izy. 35Fa holazainy hoe: Ity tany efa lao ity dia tonga tahaka ny saha Edena; ary ny tanàna efa foana sy lao dia misy mponina sady asiana mànda; 36ka dia ho fantatry ny jentilisa sisa manodidina anareo fa Izaho Jehovah no manorina indray ny efa rava sy mamboly izay efa foana. Izaho Jehovah no niteny sady hahatanteraka izany.
37Izao no lazain’i Jehovah Tompo: Mbola hotadiavin’ny taranak’Isiraely Aho amin’ny hanaovako izao ho azy; hohamaroiko toy ny ondry ny olony. 38Toy ny ondry aman-osy masina, izay any Jerosalema amin’ny fotoam-pivavahana, dia toy izany no hahafenoan’ny tanànany efa lao amin’ny olona maro toy ny ondry aman-osy; ka dia ho fantatra fa Izaho no Jehovah.
Currently Selected:
Ezekiela 36: MBP
Highlight
Share
Copy
Want to have your highlights saved across all your devices? Sign up or sign in
Baiboly Protestanta Malagasy © Malagasy Bible Society, 1965, 2019.