Ezekiela 35
35
Ny handravana an’i Edoma noho ny nandrafiany ny Isiraely.
1ARY tonga tamiko ny tenin’i Jehovah nanao hoe: 2Ry zanak’olona, manandrifia ny tendrombohitra Seïra, ka maminania ny hamelezana azy, 3dia ataovy aminy hoe: Izao no lazain’i Jehovah Tompo:
Indro, avy hamely anao Aho, ry tendrombohitra Seïra,
Ary hahinjitro aminao ny tànako, ka hataoko foana sy lao hianao.
4Ny tanànanao hataoko korontam-bato,
Ary hianao ho lao;
Ka dia ho fantatrao fa Izaho no Jehovah.
5Noho ny fandrafianao hatry ny fony ela
Sy ny nanoloranao ny Zanak’Isiraely ho fatin’#35.5 Heb. ho eo an-tànan’. ny sabatra,
Fony tamin’ny andro nahitany loza,
Dia ny fotoan’ny heloka mahafaty,
6Dia izao no lazain’i Jehovah: Raha velona koa Aho,
Dia hataoko manjary ra hianao, ary ra no hanenjika anao;
Satria tsy nankahalainao ny ra, dia ra kosa no hanenjika anao.
7Hataoko foana sy lao ny tendrombohitra Seïra,
Sady hataoko tsy misy intsony ny mandroso sy ny miverina,
8Ary hofenoiko ny olony voavono ny tendrombohiny;
Eny, ao amin’ny havoananao sy ny lohasahanao
Ary amoron’ny lohasahan-driakanao rehetra no hiampatramparan’izay voatrabaky ny sabatra.
9Hataoko rava mandrakizay hianao,
Ary tsy honenana intsony ny tanànanao;
Ka dia ho fantatrareo fa Izaho no Jehovah.
10Ary noho ny nanaovanao hoe:
Ireto firenena roa ireto sy ireto tany roa ireto dia ho ahy avokoa,
Ka hanana azy izahay–
Kanefa teo ihany Jehovah–
11Dia izao no lazain’i Jehovah: Raha velona koa Aho,
Dia hanao araka ny fahatezeranao sy ny fialonanao Aho,
Izay nataonao noho ny fandrafianao azy;
Ary hampahafantariko ao aminy ny tenako amin’ny hitsarako anao.
12Ka dia ho fantatrao fa Izaho Jehovah no efa nandre ny fanaratsiana,
Izay nolazainao ny amin’ireny tendrombohitry ny Isiraely hoe:
Foana ireny ka nomena anay ho fivelomanay.
13Ary nanao teny miavonavona namely Ahy hianareo
Sy nanamaro ny teninareo namely Ahy; efa reko izany.
14Izao no lazain’i Jehovah Tompo:
Rehefa mifaly ny tany rehetra,
Dia hofoanako kosa hianao,
15Toy ny nifalianao ny amin’ny lovan’ny taranak’Isiraely,
Satria nofoanana ireny,
Dia toy izany kosa no hataoko aminao:
Ho foana hianao, ry tendrombohitra Seïra sy Edoma rehetra;
Ka dia ho fantatra fa Izaho no Jehovah.
Currently Selected:
Ezekiela 35: MBP
Highlight
Share
Copy
Want to have your highlights saved across all your devices? Sign up or sign in
Baiboly Protestanta Malagasy © Malagasy Bible Society, 1965, 2019.