Zaburi 105
105
1 #
1 Ngoma 16.8-22
Nimushime Uwiteka mwambaze izina rye,
Mwamamaze imirimo yakoze mu mahanga.
2Mumuririmbire, mumuririmbire ishimwe,
Muvuge imirimo itangaza yakoze yose.
3Mwirate izina rye ryera,
Imitima y'abashaka Uwiteka yishime.
4Mushake Uwiteka n'imbaraga ze,
Mushake mu maso he iteka ryose.
5Mwibuke imirimo itangaza yakoze,
Ibitangaza bye n'amateka yo mu kanwa ke,
6Mwa rubyaro rwa Aburahamu umugaragu we mwe,
Mwa bana ba Yakobo mwe, abo yatoranije.
7Uwiteka ni we Mana yacu,
Amateka ye ari mu isi yose.
8Yibuka isezerano rye iminsi yose,
Ijambo yategetse aryibuka ibihe ibihumbi.
9 #
Itang 12.7; 17.8; 26.3 Ni ryo sezerano yasezeranye na Aburahamu,
Indahiro yarahiye Isaka,
10 #
Itang 28.13
Akayikomereza Yakobo kuba itegeko,
Ayikomereza Isirayeli kuba isezerano ridashira.
11Ati “Ni wowe nzaha igihugu cya Kanāni,
Kuba umwandu ukugenewe.”
12Umubare wabo ukiri muke,
Muke cyane na bo ari abashyitsi muri icyo gihugu,
13Bazerera mu mahanga atari amwe,
Bava mu bwami bajya mu bundi.
14 #
Itang 20.3-7
Ntiyakundira umuntu ko abarenganya,
Yahaniye abami ko babagiriye nabi.
15Ati “Ntimukore ku bo nasīze,
Ntimugire icyo mutwara abahanuzi banjye.”
16 #
Itang 41.53-57
Ahamagara inzara ngo itere mu gihugu,
Avuna inkoni yose bishingikirije,
Ni yo mutsima wabo.
17 #
Itang 37.28; 45.5 Atuma umugabo wo kubabanziriza,
Ni Yosefu waguriwe kuba imbata.
18 #
Itang 39.20—40.23
Bababarisha ibirenge bye iminyururu,
Bamushyiraho ibyuma,
19Kugeza aho ijambo ry'Uwiteka ryasohoreye,
Isezerano rye ryaramugeragezaga.
20 #
Itang 41.14
Umwami yaratumye baramubohora,
Umutegeka w'amahanga yaramurekuye.
21 #
Itang 41.39-41
Amugira umutware w'urugo rwe,
Amubitsa ibintu bye byose,
22Ngo abohe abakomeye be uko ashaka,
Yigishe abakuru be ubwenge.
23 #
Itang 46.6; 47.11 Kandi Isirayeli ajya muri Egiputa,
Yakobo atura mu gihugu cya Hamu.
24 #
Kuva 1.7-14
Kandi Uwiteka agwiza ubwoko bwe cyane,
Abaha gukomera kuruta abanzi babo.
25Ahindura imitima y'abo ngabo ngo bange ubwoko bwe,
Bagira ubwenge bwo kurimbura abagaragu be.
26 #
Kuva 3.1—4.17
Atuma Mose umugaragu we,
Na Aroni yatoranije.
27Bashyira hagati yabo ibimenyetso bye,
Bakorera ibitangaza mu gihugu cya Hamu.
28 #
Kuva 10.21-23
Yohereza umwijima atuma riba ijoro,
Na bo ntibagomera amagambo ye.
29 #
Kuva 7.17-21
Ahindura amazi yabo amaraso,
Yica amafi yabo.
30 #
Kuva 7.26—8.2
Igihugu cyabo cyuzura ibikeri,
Mu mazu y'abami babo.
31 #
Kuva 8.12-13,16-20 Arategeka amarumbo y'isazi araza,
N'inda mu gihugu cyabo cyose.
32 #
Kuva 9.22-25
Abaha urubura mu cyimbo cy'imvura,
N'umuriro waka mu gihugu cyabo.
33Akubita imizabibu yabo n'imitini yabo,
Avuna ibiti byo mu gihugu cyabo.
34 #
Kuva 10.12-15
Arategeka inzige ziraza,
N'uburima bitabarika.
35Birya n'imboga zose zo mu gihigu cyabo,
Birya imbuto z'ubutaka bwabo.
36 #
Kuva 12.29
Kandi akubita abana b'imfura bose,
Bo mu gihugu cyabo arabica,
Gukomera kwabo kose ni bo kwari kwatangiriyeho.
37 #
Kuva 12.33-36
Akuramo ba bandi,
Bafite ifeza n'izahabu,
Nta munyantege nke n'umwe,
Wari uri mu miryango ye yose.
38Abanyegiputa bishimira kugenda kwabo,
Kuko gutera ubwoba kwabo kwari kubafashe.
39 #
Kuva 13.21-22
Asanzura igicu cyo kubatwikīra,
N'umuriro wo kubamurikira nijoro.
40 #
Kuva 16.2-15
Barasaba azana inkware,
Abahaza umutsima wo mu ijuru.
41 #
Kuva 17.1-7; Kub 20.2-13 Atobora igitare amazi aradudubiza,
Atemba ahantu humye haba umugezi.
42Kuko yibutse ijambo rye ryera,
Na Aburahamu umugaragu we.
43Akurayo ubwoko bwe bwishimye,
Intore ze azikurayo ziririmba.
44 #
Yos 11.16-23
Abaha ubutaka bw'abanyamahanga,
Batwara ibyo abanyamahanga baruhiye.
45Bibera bityo kugira ngo bitondere amategeko ye,
Bakurikize ibyo yategetse.
Haleluya.
Currently Selected:
Zaburi 105: BYSB
Highlight
Share
Copy
Want to have your highlights saved across all your devices? Sign up or sign in
© Bible Society of Rwanda, 2001.