John 3
3
Jesus‑enkuk Nicodemus‑enkuk
1Taawanguq yuuk aatghha Nicodemus, Pharisee Jews‑et igleghutistengat. 2Unugyagu Jesus‑mun aglaghluni pikaa, “Rabbi, whangkuta liisimakamken apeghtughistenguuten kayagtekaa Kiyaghneghem. Kina alngunak allaaghlluwhaghtinaanghituq elpetun tawaten wetkuqun Kiyaghneq ellnganiskan.” 3Jesus‑em pikaa, “Ipa ungipaatamken, kitum alngunak esghaghnaanghitaa Ataneghpagullgha Kiyaghneghem wetkuqun allgenqigtekumi.” 4Nicodemus‑em aaptekaa, “Natenꞌngam anglikaq yuuk allgenqiglleqa? Ipapestaaq iteghnaanghituq naami qantagkenun allgenqiggnaluni.” 5Jesus‑em kiimsiqaa, “Ipa piimken, kina alngunak iteghnaanghituq Ataneghpagullghanun Kiyaghneghem wetkuqun allgenqigtekumi meghqunllu, Taghneghagnekunllu. 6Tamaana kemegkun allgeqaq kemguuq, iwernga tamaana taghneghagnekun allgeqaq taghneghaaquq. 7Saghiighayugpenang qayughllak ungipaaskemken, ‘Elpesi allgenqigsaghqapestaaghuusi.’ 8Anuqa naken alngunak piiquq, nagataqan sulugtallgha, iwernga nallukngwaaghan naken piiqutangallu naveklu piiqutanga. Tawateghpigaq ayuquq tamaghhaghmi allgelghii Taghneghagnekun.” 9Nicodemus‑em aaptekaa, “Natenꞌngam taana piyaghqaawa?” 10Jesus‑em kiimsiqaa, “Elpek apeghtughistelgaghlluten Israel‑eghmiinun, paninang nalluksiguu taana? 11Ipa piimken, akuzitkaqaghput liisimakegkaghput, aapghaqaghput esghaqaghput, paninang nalighhiinaghpesi ugpeqigataa ungipaghput. 12Aapghaqanka elpesinun nunam pingi iwernga ugpeqigataghpesinga, natenꞌngam ugpeqelleqesteki aapqumki qilagem pingi? 13Kina alngunak mayiigatuq qilagmun iwerngaqun Ighnegha Yugem ukikaq qilagmeng.”
14Kilgaani katam Moses‑em napaghtellghatun napaqakun bronze‑a nemeghyaq, tawateghpigaq Ighnegha Yugem napaghsaghqaalghii. 15Enkaam kina alngunak ugpeqilghii ellnganeng kenlengilngughmeng unguvallelgullequq. 16Kiyaghneghem piniqepigtutmineng nunam yuga tuunegkaa kezemaghhaq Ighneni. Ighnegha kitum alngunak ugpeqegkumigu tuqunaanghituq, iwernga allgeghlleqaa kenlengilnguq unguvalleq. 17Kiyaghneghem kayagsimangitaa Ighneni nunamun aghyuughisqelluku nunam yuganeng, kayagtekaqaa yugulighistenguluku yugnun.
18Kina alngunak ugpeqilghii Ighneghmeng aghyuullengnaanghituq. Kina alngunak ugpeqinghilnguq nanqigtengngwaaqaaguq aghyuughyaghqaaluni, qayughllak ugpeqenghilkanga kezemaghhaq Ighnegha Kiyaghneghem. 19Esgha una apallaa Kiyaghneghem aghyuughisighqaa yugnun: nighuk tagikaayaghngaan nunamun, yuget piniqataghaqaat mamlek nighugmeng qayughllak seghletun piiqelghiit. 20Kitum alngunak seghletun pikayugem ugumikaa nighuk, enkaam taginaanghituq nighugmun seghletun pilleni esghaghnayukatki. 21Iwernga kina alngunak ipapighqelluni pikayuk tagiyaghqaaguq nighugmun, esghiisqelluku qepghaqani Kiyaghneghem piyukellghakun ayuqelghii.
Jesus‑enkuk Paaptaayestallu John
22Kingunganeng taam Jesus‑enkut maligsaaghtekullghiit aglaqat Judea‑mun. Maligsaaghteminun maligulluni tamaantutkelluku paaptaayekii yuget. 23John‑llu paaptaayeghingulghii Aenon‑mi, Salim‑emeng qantaghanlengughmi, qayughllak meghllagulghii tamaana. Yuget tagilaghaatngulghiit ellnganun paaptaayesqelluteng. 24(John salin anusimingllaghvigmun kanaghtellghilnguq.)
25Ilangita John‑em maligsaaghtengita aaghtiiraaqaat ataasiq Jew ukmangighsalleghmeng Moses‑em Liilightuusaanilngughmeng. 26Enkaam aglaghluteng John‑mun ungipaatkaat, “Apeghtughista, neqamikenghisiguu yuuk elpenitkaq inglungani Jordan‑em, akuzitkegkan? Whaa maaten paaptaayeghiiquq, enkaam qamaglluteng yuget aglaghtuutnguut ellnganun.” 27John‑em kiimsiqii, “Kina alngunak allgeghunnaanghituq sameng wetkuqun Kiyaghneghem tuunegkumigu. 28Elpesi liisimakistekamsi whaten piiqngama, ‘Whanga Christ‑angunghitunga iwernga kayagtekaagunga sivungani.’ 29Ugiighnaqelghii ugikaghqaan ellngan pikaa. Nulightughnaqelghiim ilakumtaagha, kayutanga utaqiigaquq nagasugnimaghmi menganeng. Ilakumtaaghan nagaquneghminigu menga quyaghllagaquq. Tawateghpigaq whangallu quyalqa iighwightuq. 30Ellnga megnunaghataghaghnaqnguuq, whanga ukavaghnaqnguunga.”
Ukikaq Qilagmeng
31Ellnga taana pamakaghtaq aangeghllagtuq tamaghhaghllaganeng. Ellnga taana nunameng pi, nunam pikaa enkaam akuzikayuguuq nunam pinganeng. Ellnga taana qilagmeng pi, quliiguq tamaghaghllaganeng. 32Aapghaqaa esghaqanillu nagaquqanillu iwernga kitum alngunak ugpeqigatii akuzitangi. 33Kitum alngunak ugpeqegkumiki akuzitangi, tawaten pilleghmikun ipapighqaqaa Kiyaghneq ipangutanga. 34Taam Kiyaghneghem kayagtekaan atuqaqii Kiyaghneghem akuzitangi, qayughllak Kiyaghneghem Taghneghagni tuunꞌngukek ellnganun iingunalkighllukek. 35Atam piniqepigtaa Ighneq, enkaam aghtughyaghqaanghillelitkaqaa samun tamaghhaanun. 36Kina alngunak ugpelghii Ighneghqun, kenlengilngughmeng unguvallelguuq. Kitum alngunak qaatkenghilkumigu Ighneq unguvallengeqeghhnaanghituq, taawanginaq Kiyaghneghem aghyuullghanisaghqaaguq quunpeng.
Currently Selected:
John 3: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.