John 2
2
Nengughutelleq Cana‑mi
1Pingayiitangani aghneghet taawanguq nengughhnaqelghiik Cana‑mi, Galilee‑melngughmi. Jesus‑em naanga tawanlenguq, 2Jesus‑enkutlu maligsaaghtekullghiit tagsiqliqaalghiit nengughhnaqelghiignun. 3Wine‑a qamagsatgu, naangan Jesus pikaa, “Wine‑ngiitut.”
4Jesus‑em pikaa, “Aghnami whani, sasqegpenanga, salin pilleghqaqa kaasigatuq.”
5Taagken Jesus‑em naangan pikii qepghaghtet, “Sasqegkangisi legan pilghaasi.”
6Taawanguq aghvinleguftut uyghagmeng ulimaaghet melghutat. Ilangi 20 gallons‑ngulghiit, ilangi 30 gallons‑ngulghiit. (Jews‑et atuqaqegkangit ukmangighsamun Moses‑em Liilightuusaan pisqellghatun.)
7Jesus‑em pikii qepghaghtet, “Imighteki taakut melghutat meghmeng.” Imiqiit eslemkaghaghtaghluki.
8Taagken pikii, “Meghmeng imiillusi aglaateggu neqenghaghqem umiilga.”
Enkaam imiilluteng aglaatkaat. 9Umiilgem naasiiqaa meq wine‑ngughtekaq. Nallukegkanga naken taana wine‑a pingutanga. (Taakut qepghaghtet liisimakegkangat qayughllak imiilluteng meghmeng pikaalghiit.) Enkaam umiilgem tuqlughluku nulightughnaqelghii 10pikaa, “Tamaghhaghmi kiyang pinilghiimeng wine‑meng atuqaquq sivukluni enkaam aqelqat kepsuunneghata tamaana aghsaan ayuqelghii wine‑a kinguliiluku atughaqaat. Iwernga pinillgha wine‑em atuqumangisimazigu sivukluku.”
11Cana‑mi, Galilee‑melngughmi Jesus‑em apeghiiqaa allaaghlluwhaghtilleqsuwhaani. Taaggun allaaghlluwhaghtilleghmikun yugnun esghaghtestekaa aangelleghllani. Enkaam maligsaaghtengita ugpeqegkaat ipa Messiah‑nguniluku.
12Taam kingunganeng Jesus, naanga, anglegutangi, maligsaaghtengillu aglaqat Capernaum‑emun, tamaantekat qafsinat aghneghet.
Jesus Temple‑mun Pilghii
13Jews‑et neqenghaghqesaghtungestalghiit Passover‑mun enkaam Jesus aglaqaq Jerusalem‑emun. 14Temple‑mi esghaqii yuget akikulghiit ox‑eneng, penniighneng, dove‑eneng. Esghaqiillu manimeng naveghqughtet aqumluteng tipelemeggni. 15Jesus‑em kagsagutangllaghluni tapghaghmeng, Temple‑meng aanesquqii maligulluki penniighnunllu ox‑enunllu. Manilghutiit kataguutaqluki mingilatkii, ulleghquqiillu tipelngit. 16Taagken yuget akilpegalghiit dove‑eneng qelqii whaten, “Aanuteki whaken! Atama Mangteghaa akilpegaghvigughtegpenaan.” 17Maligsaaghtengita neqaatkaat Akuzitet Igaqegkat pillghat, “Megnukingalqa Mangteghaghpenun naafqutkennaqngwaaqa.” 18Taagken Jews‑et igleghutestengita aaptekaat Jesus, “Kitum qeleghtaten tawaten pisqelluten? Kiyaghneghem pisqumakangaten, allaaghlluwhaghti ipapighqusighqameng.” 19Jesus‑em kiimsiqii, “Naafqiteggu una temple‑a, pingayuni aghneghni nekefleqaqa.” 20Aaptekaat, “Elpaak nekefleqsiguu pingayuni aghneghni? 46‑nguut ayumiqullghet nekeftusiqegkaat uumun Temple‑mun.” 21Iwernga Jesus‑em akuzitkengngukanga ellmi yugusini temple‑nguluku. 22Unguvaghtaqngan tuqulleghmeng maligsaaghtengita neqaatkaat whaten pillgha, “Una temple‑a, pingayuni aghneghni nekefleqaqa.” Enkaam ugpeqegkiit Akuzitet Igaqegkat, Jesus‑emllu akuzillghi.
Jesus‑em Liisimakegkangi Qamaglluki Yuget Natetulangi
23Jesus Jerusalem‑emelluku Passover‑em neqenghaghqellghani, uglapiglleghhiit esghapagluki allaaghlluwhaghtillghi ugpeqegkaqegkangat, 24iwernga Jesus‑em ugpequmangilkangi. 25Kinkunun alngunak ungipaanneghisaghngaatni ayuqelghii yugneng qayughllak liisimakegkangi natetulangi.
Currently Selected:
John 2: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.