Jɔn 6
6
Niriba tusaanu dihibu
(Matiu 14.13-21; Maak 6.30-44; Luk 9.10-17)
1-4Di saha ka Yɛhudianim’ Yaɣigari Chuɣu daa ti mirina. Ka Yisa daa baai du Galili Teeku shɛli bɛ ni booni Taibɛrias Teeku la duli; ka salo pam daa dol’ o o ni daa wuhiri shihir’ shɛŋa bɛn nyɛ dɔrɔnim’ tibbu ni la zuɣu. Ka o min’ o nyaandoliba daa du zo’ shɛli zuɣu ti laɣim ʒini. 5Ka Yisa daa duh’ o zuɣu n-nya ka salo pam kani o sanna, ka o naanyi bɔhi Filip, “Ya polo ka ti lee yɛn nya bindirigu n-da n-ti niriba ŋɔ zaa ka bɛ di n-tiɣi?” 6O daa yɛlila lala ni o zahim o, dama omaŋmaŋ’ daa mi o ni yɛn niŋ shɛm.
7Ka Filip yɛl’ o, “Hal tumtumda chira anii yɔri ku tooi da bindirigu ka niriba ŋɔ zaa paai biɛlabiɛla gba di.”
8Ka Saimɔn Pita mabia Anduru ŋun daa nyɛ Yisa nyaandoliba maa ni yino la yɛli Yisa, 9“Bidib’ bil’ so n-naɣ’ be kpe m-mali bɔrɔbɔro kpila anu mini zahim ayi, amaa ka bɔ ka di yɛn niŋ salo ŋɔ zaa?” 10Nimaani daa mali momaha pam, ka Yisa yɛl’ o nyaandoliba maa ni bɛ yɛlim’ salo maa ni bɛ ʒinima. Ka dɔbba bɛn daa ʒini kalinli daa nyɛla kaman tusaanu laasabu. 11Ka Yisa daa zaŋ bɔrɔbɔro maa m-paɣi Naawuni di zuɣu, ka zaŋ li tari salo maa; ka lan niŋ zahim la gba lala hal ka bɛ zaa ti nya bɛ ni bɔri shɛm tariga. 12Bɛ ni daa di n-tiɣi zaa, ka o yɛl’ o nyaandoliba ni bɛ laɣisim’ bɔrɔbɔro chɛhi din guui maa zaa ka di shɛli ku bahi yoli. 13Ka bɛ daa laɣisi bɔrɔbɔro kpila anu shɛŋa bɛ ni daa ŋub’ maa zaɣ’ chɛhi pali piɛri pinaayi.
14Niriba maa ni daa nya shihir’ shɛli Yisa ni wuhi maa ka bɛ yɛli, “Yɛlimaŋli, bɛ ni daa yɛli ni anab’ so ni ti ka dunia ŋɔ ni na la#6.14 Bɛ ni daa yɛli ni anab’ so ni ti ka dunia ŋɔ ni na la: Lihimi suurili 1.21 puuni. n-shiri bala!” 15Yisa ni daa baŋ ni niriba maa loya ni bɛ gbaag’ o ni kiŋkansi ti leei bɛ naa maa, ka o daa ŋoli yi bɛ sunsuuni n-chaŋ ti du zo’ shɛli zuɣu m-be nimaani o kɔŋko.
Yisa tam kom zuɣu chana
(Matiu 14.22-33; Maak 6.45-52)
16Ka di daa ti niŋ zaawun’ yuŋ ka Yisa nyaandoliba maa chaŋ teeku ni 17nti kpe ŋariŋ ni bɛ baai du Kapɛrinium polo. Ka di daa mali ti zibi ka Yisa na bi ka bɛ sanna. 18Ka sanʒiɛ’ titali daa ti yiɣisi ʒiɛra, ka teeku maa kɔgbana kul puɣiri lura. 19Ka bɛ daa duhi ŋariŋ maa chaŋ kaman maal’ anahi bee ata nti nya Yisa ka o tam kom zuɣu chanina ti miriti bɛ ŋariŋ maa, ka dabiɛm daa gbahi ba pam. 20Ka o yɛli ba, “Di zɔriya dabiɛm! Mani m-bala.” 21Ka bɛ daa saɣi n-chɛ ka o kpe bɛ ŋariŋ maa ni, ka ŋariŋ maa dii mali ti to bɛ ni daa baari duri yaɣ’ shɛli polo maa.
Niriba bɔri Yisa shee
22N-yi biɛɣu ka niriba bɛn daa kpalim duli din’ la polo kpahim baŋ ni ŋariŋ yini kɔŋko n-sa ʒe nimaani, ka lan mi ni Yisa sa bi kpe ŋariŋ maa ni pah’ o nyaandoliba maa zuɣu, amaa kulla bɛ kɔŋko n-sa kpe li chaŋ. 23Di saha ka ŋarin’ shɛŋa din daa yi Taibɛrias na kana ti zani miri luɣ’ shɛli ti Duuma Yisa ni sa paɣi Naawuni bɔrɔbɔro zuɣu ka zaŋ li ti niriba ka bɛ ŋub’ la. 24Niriba maa ni daa nya ka Yisa min’ o nyaandoliba zaa ka nimaani maa zuɣu ka bɛ daa kpe ŋarima maa n-chaŋ Kapɛrinium ni bɛ ti bo Yisa shee.
Yisa ŋun nyɛ nyɛvili bindirigu
25Ka niriba maa daa ti nya Yisa duli din’ maa polo bɔh’ o, “Karimba, bɔ saha ka a ka kpe na?”
26Ka Yisa yɛli ba, “Achiikatim, yɛlimaŋli ka n yɛri ya, pa shihir’ shɛŋa yi ni sa nya la zuɣu ka yi bɔri n shee maa, amaa yi ni sa ŋub’ bɔrɔbɔro la tiɣ’ la zuɣu. 27Di nahindiya yimaŋ’ bindir’ shɛli din ni saɣim zuɣu, amaa bomiyala bindir’ shɛli din ni be hal ni saha din ka bahigu. Dina n-nyɛ Daadam Bia ni mali shɛli tiri ya la, dama ŋuna ka ti Ba Naawuni zaŋ o dalinli dihi tabili.”
28Di saha ka bɛ bɔh’ o, “Wula ka ti lee yɛn niŋ tum din nyɛ Naawuni tuma?”
29Ka Yisa garigi yɛli ba, “Tuun’ shɛli Naawuni ni bɔri ni yi tum nyɛla ni yi niŋ o ni tim so na la yɛda.”
30Ka bɛ bɔh’ o, “Ka shihir’ bɔ ka a yɛn wuhi ka ti nya ka niŋ a yɛda? Alahiziba tuun’ bɔ ka a lee tumda? 31#Yibu 16.4, 15; Yila 78.24 Ti yaannim’ daa di bindiri’ shɛli bɛ ni daa booni manna la mɔɣu ni kaman di ni sabi shɛm Naawuni Kundi ni la. Di sabiya: ‘O daa ti ba bindirigu din yi alizanda ni na ka bɛ di.’ ”
32Ka Yisa yɛli ba, “Achiikatim, yɛlimaŋli ka n yɛri ya, pa Anabi Musa n-daa tin ya bindiri’ shɛli din yi alizanda ni na maa; amaa m Ba n-tiri ya bindiri’ maŋli din yiri alizanda ni na maa. 33Dama Naawuni bindirigu nyɛla din yi alizanda ni na, ka nyɛ din tiri dunianim’ nyɛvili.”
34Ka bɛ yɛl’ o, “Ti Duuma, ka dindina tim’ ti bindirigu maa sahakam.”
35Ka Yisa yɛli ba, “Mani n-nyɛ nyɛvili bindirigu maa. Ka ŋunkam ka n sanna, kum ku lan gbaag’ o; ka ŋunkam mi niŋ ma yɛda, kɔnyuri ku lan gbaag’ o hal abada. 36Amaa kaman n ni pun yɛli ya shɛm la, yi nya ma ni yi nini, amaa ka bi niŋ ma yɛda. 37M Ba ni zaŋ shɛb’ zaa ti ma ni ka n sanna, ka ŋunkam mi ka n sanna, n ku zaɣis’ o. 38M bi yi alizanda ni na ni n ti tumla mmaŋmaŋ’ yubu, amaa ŋun tim ma na maa yubu ka n kana ni n ti tum. 39Ŋun tim ma na maa yubu nyɛla ni n di bahi o ni zaŋ ninvuɣ’ shɛb’ zaa ti ma la ni yino, amaa ni n ti neei ba kum ni zaadali. 40M Ba Naawuni yubu nyɛla ni ŋunkam nya o Bia la ka niŋ o yɛda ni nya nyɛvili din ka bahigu, ka n ti neeg’ o kum ni zaadali.”
41Di saha ka Yɛhudianim’ daa ŋumdi bɛ kparima ni niŋdi Yisa, o ni daa yɛli ni o nyɛla bindirigu din yi alizanda ni na la zuɣu. 42Bɛ daa bɔhimi, “Pa Yisifu bia Yisa ŋun nyɛ ti ni mi so ba min’ o ma la m-bala? Ka di chaŋ wula ka o ti yɛli ni o yila alizanda ni na?”
43Ka Yisa yɛli ba, “Di ŋumdiya yi kparima ni. 44So ku tooi ka n sanna ka pa ni m Ba Naawuni ŋun tim ma na maa n-vo o tahina; ka n ti neeg’ o kum ni zaadali.” 45#Aiz 54.13 Ka lan yɛli, “Di pun sabi anabinim’ litaafinim’ ni ni ‘Naawuni n-nyɛ ŋun ni wuhi sokam zaa.’ Ka ŋunkam wum ka bɔhim m Ba sani n-nyɛ ŋun kani n sanna. 46Dimbɔŋɔ bi wuhiri ni so pun nya m Ba maa; naɣila ŋun yi ŋun’ Naawuni sanna la n-naɣ’ nyɛ ŋun nya o. 47Achiikatim, yɛlimaŋli ka n yɛri ya, ŋunkam niŋ yɛda mali nyɛvili din ka bahigu. 48Mani n-nyɛ nyɛvili bindirigu. 49Yi yaanniin’ daa di bindir’ shɛli bɛ ni daa booni manna la mɔɣu ni ka kpi. 50Amaa bindiri’ shɛli din yi alizanda ni na maa n-nyɛ nir’ ni ni di shɛli ka ku kpi. 51Mani n-nyɛ bindirigu din mali nyɛvili n-yi alizanda ni na maa. Ka ŋunkam di bindirigu ŋɔ ni be hal ni saha din ka bahigu; bindiri’ shɛli mi n ni yɛn zaŋ ti dunianima ka bɛ nya nyɛvili di zuɣu maa nyɛla n niŋgbuŋ.”
52Dimbɔŋɔ zuɣu ka Yɛhudianim’ suhuri daa yiɣisi ka bɛ ŋmɛr’ o ni yɛli shɛm maa naŋgbankpeeni ka bɔhiri taba, “Wula ka doo ŋɔ ni tooi zaŋ o niŋgbuŋ ti ti ka ti ŋubi?”
53Ka Yisa yɛli ba, “Achiikatim, yɛlimaŋli ka n yɛri ya, faashee yi ŋub’ Daadam Bia niŋgbuŋ ka nyu o ʒim, di yi pa lala yi ku mali nyɛvili. 54Ŋunkam ŋubi n niŋgbuŋ ka nyu n ʒim, ŋuna n-nyɛ ŋun mali nyɛvili din ka bahigu, ka n ni ti neeg’ o kum ni zaadali. 55Dama n niŋgbuŋ nyɛla bindir’ maŋli, ka n ʒim mi nyɛ binnyur’ maŋli. 56Ŋunkam ŋubi n niŋgbuŋ ka nyu n ʒim, dilana be n ni ka n gba be o ni. 57Kaman m Ba Naawuni ŋun be ŋɔ ni tim ma na ka m be m Ba maa zuɣu shɛm, lala ka ŋunkam ŋubi n niŋgbuŋ gba ni be n zuɣu. 58Dimbɔŋɔ n-nyɛ bindiri’ shɛli din yi alizanda ni na maa. Di bi be kaman yi yaannim’ ni daa di shɛli ka kpi la, amaa ŋunkam di bindirigu ŋɔ dina, dilan’ ni be hal ni saha din ka bahigu.”
59Yisa daa tɔɣisi yɛtɔɣa ŋɔ la saha shɛl’ o ni daa wuhiri niriba Yɛhudianim’ jɛmbu duu Kapɛrinium la.
Nyɛvili din ka bahigu yɛtɔɣa
60Yisa nyaandoliba maa ni pam ni daa wum yɛtɔɣa ŋɔ bɛ daa yɛlimi, “Yɛtɔɣili ŋɔ din’ kpɛm’ pam; ŋuni n-lee ni tooi deei li?”
61Amaa ka Yisa daa baŋ ni o nyaandoliba maa ŋumdi bɛ kparima ni yɛtɔɣili maa zuɣu ka bɔhi ba, “Yi suhuri miligimi yɛtɔɣili ŋɔ zuɣu? 62To, ka yi yi ti nya ka Daadam Bia labiri o ni daa pun be luɣ’ shɛl’ la, wula ka di lee ni ti ben ya? 63Niŋgbuŋ kɔŋko ka buchi; shia n-nyɛ ŋun tiri nyɛvili. Ka n ni pun tɔɣisi ya yɛtɔɣ’ shɛŋa la mi nyɛla shia mini nyɛvili yɛla, 64amaa yi ni shɛb’ bi niŋ li yɛda.” Yisa daa pun mi piligu ni ha bɛn bi niŋ o yɛda ni nyɛ shɛba, ka lan mi ŋun ti yɛn yi o nyaaŋa ni nyɛ so. 65Yisa daa lan yɛli, “Lala zuɣu ka m pun yɛli ya ni so ku tooi ka n sanna ka pa ni m Ba n-niŋ o di yiko.”
66Dimbɔŋɔ nyaaŋa ka Yisa nyaandoliba maa ni pam daa chɛ o dolibu. 67Di saha ka Yisa daa bɔhi o nyaandoliba pinaayi la, “Yi gba ni chɛ ma dolibu?”
68Ka Saimɔn Pita bɔh’ o, “N Duuma, ŋun’ sani ka ti yɛn chaŋ? Nyini m-mali nyɛvili din ka bahigu yɛtɔɣa. 69#Mat 16.16; Maak 8.29; Luk 9.20 Ka ti niŋ yɛda ka mi ni nyini n-nyɛ Naawuni Ninvuɣ’ Suŋ so o ni timna.” 70Ka Yisa bɔhi ba, “Pa yi ninvuɣ’ pinaayi ka m pii ka yi ni yino ti nyɛ Sintani nir’ la?” 71Saimɔn Isikariɔt bia Judas la yɛla ka o daa yɛri maa, dama ŋuna n-daa nyɛ ŋun ti yɛn yi o nyaaŋa ka mi nyɛ bɛ pinaayi maa ni yino la.
Currently Selected:
Jɔn 6: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011