Jɔn 5
5
Yisa tib’ do’ so biaŋ gbini
1Dimbɔŋɔ nyaaŋa ka Yɛhudianim’ chu’ shɛli daa ti yɛn puhi, ka Yisa daa chaŋ Jɛrusalɛm. 2Been shɛli daa be Jɛrusalɛm n-do m-miri duno’ shɛli bɛ ni daa booni Piɛri Dunol’ la. Hiburuli ni bɛ booni biaŋ maa la Bɛtizata, ka lunfanima anu daa be nimaani. 3Barinim’ pam bɛn gbarigi n-daa kul do lunfanim’ maa ni: Zoomba mini gbariti ni bɔɣukpimanima ni gbalikpimanima. [Bɛ daa doya gulila kom maa dambu, 4dama malaika n-daa yi siɣirina sahasaha ti damdi kom maa. Ka o daa yi ti dam li ka ŋunkam daŋ di ni siɣibu, dɔr’ shɛlikam din mal’ o bahir’ o mi.] 5Dɔro ni daa mali do’ so yuun’ pihinahaayika gba daa do nimaani. 6Yisa ni daa nya o ka baŋ ni o dɔni nimaani yuui maa ka o bɔh’ o, “A bɔri ni a nya alaafee?”
7Ka dɔrolan’ maa garigi yɛl’ o, “N Duuma, kom maa yi ti dam, n ka so ŋun ni zaŋ ma siɣi di ni, ka mmaŋmaŋ’ yi chani ni n ti siɣi, so daŋdi ma la di ni siɣibu.”
8Ka Yisa yɛl’ o, “Yiɣisima n-kpuɣ’ a bindoo chaŋ.” 9Ka doo maa dii nya alaafee, ka kpuɣ’ o bindoo chaŋ o chandi. Dindali maa daa nyɛla Vuhim Dabisili dali. 10#Nɛh 13.19; Jɛr 17.21 Lala zuɣu ka Yɛhudianim’ daa yɛli do’ so ŋun kpaŋ maa, “Zuŋɔ nyɛla Vuhim Dabisili dali; di bi luhi ni a kpuɣ’ a bindoo maa n-ʒiri li chana.”
11Ka o yɛli ba, “Do’ so ŋun tib’ ma maa n-yɛli ma ni n kpuɣimi m bindoo maa chaŋ.”
12Ka bɛ bɔh’ o, “Ŋuni n-lee yɛl’ a ni a kpuɣim’ a bindoo chaŋ maa?”
13Do’ so ŋun daa kpaŋ maa daa bi mi ŋun chɛ ka o kpaŋ maa ni nyɛ so, dama salo daa galisiya nimaani, ka Yisa mi pun yi ni chaŋ o chandi.
14Di nyaaŋa ka Yisa daa ti nya doo maa Naawuni jɛmbu duu yɛl’ o, “Nyama, a kpaŋya zaa! Di lan tum alahichi din ni chɛ ka zaɣ’ biɛɣu din gari din’ la ti paag’ a yaha!”
15Ka doo maa daa chaŋ ti yɛli Yɛhudianima ni Yisa n-nyɛ ŋun daa chɛ ka o kpaŋ la.
16Yisa ni daa niŋ li Vuhim Dabisili dali maa zuɣu daa chɛ ka Yɛhudianim’ maa muɣisi Yisa pam. 17Amaa ka Yisa daa yɛli ba, “M Ba kul tumdimi, ka n gba tumda.”
18Lala zuɣu ka Yɛhudianim’ daa maan mooi bɛ nini bɔri ni bɛ ku o, dama bɛ daa zaŋ zali ni o bi saɣim la Vuhim Dabisili dali zaligu kɔŋko, amaa ni o yɛliya ni Naawuni n-nyɛ o Ba, ka di wuhi ni o zaŋ omaŋ’ maɣisi Naawuni.
Naawuni Bia ni su fukumsi shɛm
19Ka Yisa daa yɛli ba, “Achiikatim, yɛlimaŋli ka n yɛri ya, Bia maa ku tooi niŋ shɛli omaŋmaŋ’ yubu ni naɣila o ni nya ka o Ba niŋdi shɛli, dama Ba maa ni niŋdi shɛli, dina ka Bia maa gba niŋda. 20Ba maa yur’ o Bia maa, ka wuhir’ o omaŋmaŋ’ ni niŋdi shɛlikam zaa, ka ni lan wuh’ o tuun’ kara gari dimbɔŋɔnima din ni chɛ ka di niŋ ya alahiziba. 21Ba maa ni neeri kpiimba kum ni ka tiri ba nyɛvili shɛm, lala ka Bia maa gba tiri o ni bɔri so nyɛvili. 22Ba maa bi kariti so saria, amaa o zaŋ saria karibu yɛla zaa niŋla o Bia maa nuu ni 23ni di chɛ ka sokam zaa ti Bia maa jilima kaman bɛ ni tir’ o Ba maa jilima shɛm. Ŋunkam bi tiri Bia maa jilima bi tirila o Ba ŋun tim o maa na jilima.”
24Yisa daa lan yɛli, “Achiikatim, yɛlimaŋli ka n yɛri ya, ŋunkam wum n yɛligu ka niŋ ŋun tim ma na maa yɛda mali nyɛvili din ka bahigu; ka bɛ ti ku lan kar’ o saria, dama o pun yi kum ni kpe nyɛvili ni. 25Achiikatim, yɛlimaŋli ka n lan yɛri ya, saha kanna, hal di paaya gba, ka kpiimba ni ti wum Naawuni Bia maa kukoli, ka bɛnkam ti wum li ni mali nyɛvili. 26Ba maa ni mali nyɛvili omaŋmaŋ’ ni shɛm, lala ka o ti o Bia maa yiko ni o gba mali nyɛvili omaŋmaŋ’ ni. 27Ka lan ti o yiko ni o kari saria, o ni nyɛ Daadam Bia la zuɣu. 28Di chɛliya ka dimbɔŋɔ niŋ ya alahiziba, dama saha kanna ka bɛnkam zaa be gbala ni ni ti wum o kukoli 29#Dan 12.2 ka yina. Bɛn daa tum tuun’ suma ni ti neei kum ni n-nya nyɛvili; ka bɛn mi daa tum tuumbiɛri ti neei kum ni n-nya saria karibu.”
Yisa shɛhiralaannima
30Yisa daa lan yɛli yaha, “N ku tooi niŋ shɛli mmaŋmaŋ’ yiko ni; n ni wum shɛm, dina ka m mali kariti saria, ka n sariakaribo maa mi nyɛla din tuhi, dama m bi bɔri mmaŋmaŋ’ yubu, amaa ŋun tim ma na maa yubu ka m bɔra.
31 “N yi di mmaŋ’ shɛhira, n shɛhira maa ku nyɛla shɛhira maŋli. 32Amaa so beni ŋun diri ma shɛhira, ka m mi ni o ni diri ma shɛhira shɛli maa nyɛla shɛhira maŋli. 33#Jɔn 1.19-27; 3.27-30 Yi daa tim tuumba Jɔn Baptaizira sani, ka o gba daa di yɛlimaŋli ŋɔ shɛhira. 34M bi zaŋ mmaŋ’ dalimla ninsal’ shɛhira, amaa n yɛli ya la dimbɔŋɔ yi tiliginsim nyabu zuɣu. 35Jɔn daa nyɛla firila din diri ka ne, ka yi daa saɣi m-mali suhupiɛlli o neesim maa ni daba ayi. 36Amaa m-mali shɛhira din gari Jɔn shɛhira maa; dama tuun’ shɛŋa m Ba Naawuni ni zali ma ni n tum, dina ka n tumda; ka tuun’ shɛŋa n ni tumdi maa mi diri ma shɛhira ni m Ba n-shiri tim ma na. 37#Mat 3.17; Maak 1.11; Luk 3.22 Ka m Ba ŋun tim ma na maa gba diri ma shɛhira. Yi na ʒi n-wum o kukoli bee n-nya o ni be shɛm ni yi nini; 38ka o yɛligu mi ka yi suhuri ni, dama yi bi niŋ o ni tim so na la yɛda. 39Yi vihiri Naawuni Kundi, dama yi tɛhiya ni di ni ka yi ni nya nyɛvili din ka bahigu; ka Naawuni Kundi maa maŋmaŋ’ gba diri ma shɛhira. 40Amaa ka yi zaɣisi ni yi ku ka n sanna ti nya nyɛvili.
41 “M bi bɔri jilima ninsalinim’ sani. 42M min ya, ka lan mi ni yi bi yuri Naawuni yi suhuri ni. 43M Ba Naawuni yuli ka n zaŋ kana, ka yi ti bi deei ma, amaa so yi ti zaŋ omaŋmaŋ’ yuli kana, ŋuna ka yi ni deei.” 44Ka ŋmaligi bɔhi ba, “Wula ka yinim’ bɛn bi bɔri jilima Naawuni ŋun kɔŋko kul nyɛ Naawuni ŋɔ sani, amaa ka bɔri jilima la yi tab’ sani ŋɔ lee yɛn tooi niŋ yɛda? 45Di tɛhiriya ni n ni tɔɣisi yi din bie yɛla m Ba sani; ŋun ni tɔɣisi yi din bie yɛla o sani beni, ŋuna n-nyɛ Anabi Musa yi ni zaŋ yi tahima zaa niŋ so ni la. 46Yi yi di niŋ Anabi Musa yɛda, yi naan niŋ n gba yɛda, dama o daa sabi n yɛla zali. 47Amaa ka yi yi bi niŋ o ni daa sab’ shɛm maa yɛda, wula ka yi lee ni niŋ n yɛligu yɛda?”
Currently Selected:
Jɔn 5: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011