LATE 102
102
Misiengthou thumna
Gimthuoh mi’n aba laitah a Mangpa mai a alungkhamna thu atutna.
1Aw Mangpa, ka thungetna hing ngaikhie inlen,
ka kikouna husa Nangma kungah hing tung hen.
2Ka genthei ni chiengin kei a pat na mai phuol sin.
Na bil kei langah hing daw inlen,
ka hing hat ni chiengin hing dawng paiin.
3Aziehpen ka damsung nite meikhu bangin azammang zel hi.
Ka gute zong taptunga mei-amsa abang ta hi.
4Ka lungtang vuoh in a uma,
hampa bangin avuoita a,
ka ann neh ding nangawn ka manghilta hi.
5Ka thum ka mauna aw zieh in,
ka gute ka vun ah abeh chinten hi.
6Gamdai simbupi bang ka hita a,
khogem nua a simbuneu bang giap ka hita hi.
7Ka hah ngitnget a,
Inntunga vatou amatanga um bang kana hita hi.
8Sun nitum in ka melmaten ahing gensie ua,
ka tunga hangsanten ka tungah hamsie alou uhi.
9Vut khu ann bangin ka ne a,
ka dawn ding khu ka hitui toh akihal hi.
10Na thangpaina zieh leh na lungthahna zieh in,
Na hing domkanga na hing paikheta hi.
11Ka damsung nite lah nitahlam nihim kihei bang giap ahi a;
hampa bangin ka vuoigawpta hi.
12Hinanleh Aw Mangpa,
nang pen kumtawn a um ding na hia,
na min theizingna zong akhang akhangin,
a umden ding hi.
13Na thou dinga,
Zion muol na khotuo ding a, lainatna na nei ding hi;
a ma deisahna ding hun atung ta ngal a,
ahi, hun guot khu atungta hi.
14Aziehpen na suohten asuongte adeithaw mama ua,
a leivuite na ngawn angaina uhi.
15Namten Mangpa min a zau ding ua,
leitunga leengte zousie in na thupina azau ding uhi.
16Aziehpen Mangpa’n Zion alamtha kia dinga,
athupina toh ahing kilang kia ding hi.
17Aman bangmaneiloute thumna angaisah dinga,
athumnate uh asimmaw sih ding hi.
18Tam thu khangtha hing um dingte dinga gel ahi ding a,
nam hing kisiemkhe dingte’n,
Mangpa apahtawi theina ding uh ahi hi.
19Tuachi’n Mangpa’n amun siengthou sangtah akipat in ahing ensuh a,
Mangpa’n van a kipat in leitung a ensuh hi.
20Aman suongkul taangte tau thawm aza dinga;
shi dinga kiguotte aphelkhe ding hi.
21Tuachi’n Zion ah Mangpa min akiphuongzah dinga,
tualeh Ama phatna Jerusalem ah kiphuongzah ding ahi.
22Mipite leh leenggamte Mangpa be dinga,
ahing kikhop khawm hun chiengun,
23Aman lamkaal ah ka tha atawlsah a,
ka damsung nite asutomta hi.
24Ken, “Aw ka Pasian,” ka damsung hatlai nite ah,
“Hing lamang nai sin;
Nangma kumte pen akhang akhang a umden ding ahi hi.”
25 #
Heb. 1.10-12
Nangma’n leitung kingahna nidanglai peh a na phumsa ahi a,
vante zong na khutsuoh ahi.
26Tuate ahing mangthang ding ua,
hinanleh Nang pen na umden ding hi;
Ahi tuate zousie pen puonsil bangin ahing lui ding ua,
puonsil bangin na hengta ding a,
tuachi’n ahing kihengta ding uhi.
27Hinanleh Nang pen angai ngai na hi a,
Na kumte zong a bei ngaisih ding hi.
28Na suohte tate pen aumzing ding ua,
tualeh ahah asuonte uh zong na masang ah suhdet in aum ding uhi.
Ka chi hi.
Currently Selected:
LATE 102: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.