Біблія для дзяцейУзор

Хто стварыў нас? Слова Божае, Біблія, распавядае нам, з чаго пачалося чалавецтва. Вельмі даўно Бог стварыў самага першага чалавека і назваў яго Адамам. Бог стварыў Адама з праху зямнога. Калі Бог удыхнуў жыццё ў Адама, той ажыў. Ён апынуўся ў выдатным садзе пад назвай Эдэм.

Перад тым, як стварыць Адама, Бог стварыў цудоўны свет, напоўнены выдатнымі рэчамі. Крок за крокам Бог ствараў пагоркі і стэпавыя прасторы, духмяныя кветкі і высокія дрэвы, ярка апераных птушак і шумлівых пчолак, няўклюдных кітоў і слізкіх слімакоў. На самой справе, Бог зрабіў усё, што існуе – літаральна ўсё.

Напачатку, калі Бог яшчэ нічога не стварыў, не было нічога, акрамя Бога. Не было людзей, не было аніякага месца або рэчы. Нічога. Не было святла і цемры. Не было верху і нізу. Не было ўчора і заўтра. Быў толькі Бог, Які не мае пачатку. І тады Ён пачаў дзейнічаць!

На пачатку Бог стварыў неба і зямлю.

І зямля была бясформенная і пустая. І была цемра над безданню. Тады Бог казаў. “Няхай будзе святло”.

І з’явілася святло. І Бог назваў святло днём, а цемру ноччу. І быў вечар, і была раніца: першы дзень.

На другі дзень Бог размясціў ваду акіянаў, мораў і азёраў пад нябёсамі і аблокамі. На трэці дзень Бог сказаў: “Няхай будзе суша” І гэтак здарылася.

Бог наказаў з'явіцца траве, і кветкам, і хмызняку, і дрэвам. І яны з'явіліся. І быў вечар, і была раніца: дзень трэці.

Тады Бог стварыў сонца, месяц і так багата зорак, што ніхто не можа пералічыць іх. І быў вечар, і была раніца: дзень чацвёрты.

Марскія істоты, рыбы і птушкі былі наступнымі ў Божым спісе спраў. На пяты дзень ён стварыў вялікую меч-рыбу і малюсенькіх сардзінак, даўганогіх страусаў і шчаслівых маленькіх калібры. Бог стварыў кожны від рыбы, што запоўніла ваду, і ўсе віды птушак, якія радасна ляталі ў небе над зямлёй і морам. І быў вечар, і была раніца: дзень пяты.

Пасля гэтага Бог зноў прамовіў. Ён сказаў: “Няхай уродзіць зямля жывых істот...” Так на свет зʼявіўся кожны від жывёлін, насякомых і паўзуноў. Гэта былі сланы, ад тупату якіх трэслася зямля, і ўвесь час занятыя бабры. Гарэзныя малпачкі і непаваротлівыя кракадзілы. Вёрткія чарвякі і нахабныя бурундукі. Цыбатыя жырафы і варкочучыя каты. У той дзень Бог стварыў кожны від жывёлін. І быў вечар, і была раніца: дзень шосты.

Бог зрабіў яшчэ нешта на шосты дзень – нешта вельмі асаблівае. Усё цяпер было гатова для паяўлення Чалавека. Была ежа на палях і жывёлы, каб служыць яму. І Бог сказаў: “Створым чалавека па вобразу Нашаму. Няхай ён будзе гаспадаром над усім на зямлі.” І СТВАРЫЎ БОГ ЧАЛАВЕКА ПАВОДЛЕ ВОБРАЗУ СВАЙГО; ПАВОДЛЕ ВОБРАЗУ БОЖАГА ЁН СТВАРЫЎ ЯГО.

Бог сказаў Адаму. “Ешце з саду тое, што вы хочаце. Але нельга есці толькі ад дрэва пазнання дабра і зла. Калі вы з’ясце з гэтага дрэва, вы памраце.”

І сказаў Гасподзь Бог: “Не добра, што чалавек павінен быць адзін. Я зраблю яму памочніка”. Бог прывёў да Адама ўсіх птушак і звяроў. Адам даў ім усім імёны. Безумоўна, ён быў вельмі разумным, калі мог гэта зрабіць. Але сярод усіх птушак і звяроў для Адама не знайшлося прыдатнага партнёра.

Бог зрабіў так, што Адам глыбока, глыбока заснуў. Потым Бог выдаліў з яго цела адну з рабрын і стварыў з яе жанчыну. Створаная Богам жанчына цалкам падыходзіла Адаму ў якасці партнёра.

Бог стварыў усё за шэсць дзён. І потым Бог благаславіў сёмы дзень, і зрабіў яго днём адпачынку. Адам і яго жонка Ева шчасліва жылі ў Эдэмскім садзе, падпарадкоўваючыся Богу. Бог быў іх Гасподзь, Ён забяспечваў іх усім неабходным, а таксама Ён быў ім Сябрам.

Канец