БОГ + ПЛЯНЫ: Як плянаваць, калі ты хрысьціянінУзор

ДЗЕНЬ 1:  Ці добра плянаваць, калі ты хрысьціянін?

Вы хочаце ісьці за Богам І дабівацца заплянаваных мэтаў. Але вы перажываеце, што пастаноўка мэт адвядзе вас ад Божых плянаў адносна вас. Такім чынам, вы задаяце пытаньне: "Ці правільна ставіць мэты, калі ты хрысьціянін? Што кажа Божае Слова пра тое, як зрабіць гэта і рухацца ў адпаведнасьці з Яго воляй?" Бог можа шмат сказаць пра мэты, сьвядомае плянаваньне і добрае кіраваньне тым, што нам дадзена. 

Кароткі адказ: мэты добрыя! Нават у Ісуса былі мэты. Бог жадае, каб мы жылі сьвядома, не выпадкова. Той факт, што вы пытаецеся і шукаеце Яго волі, азначае, што вы хочаце пражыць жыцьцё добра. Яго Слова будзе паказваць вам, як ставіць правільныя мэты і мець матывацыю для іх дасягненьне. 

Але ня варта чакаць, што ў Бібліі знойдзецца канкрэтны сьпіс альбо хуткая формула для пастаноўкі мэт. Калі б гэта было так проста, мы маглі б прачытаць сьпіс, выканаць яго і ніколі не размаўляць з Богам пра свае пляны. Гаворка ідзе не пра тое, каб прытрымлівацца правілаў, а пра адносіны з Тым, Хто стварыў вас з унікальнымі дарамі і талентамі, якім можна карыстацца, – з Самім Богам. 

Якая альтэрнатыва добраму плянаваньню? Блукаць бяз мэты ды глядзець, як праходзіць вашае жыцьцё. Падумайце. Ці хто-небудзь з ключавых фігур Бібліі проста сядзеў і нічога не рабіў? Вядома, у іх былі памылковыя крокі, але Майсей, Давід, Саламон, Эстэр, Рут, Ян, Павал і сам Ісус мелі мэты, і яны дасягалі іх з Божай сілай і мудрасьцю. Вы зьбіраецеся зрабіць тое самае, адзін маленькі крок і скачок веры за раз.

Памаліцеся зараз: Госпад, я хачу ісьці за Табой, ставячы мэты, якія адпавядаюць Тваёй волі для майго жыцьця. Дзякуй, што стварыў мяне з унікальнымі дарамі і талентамі, якія можна выкарыстоўваць для Тваёй вялікай мэты. Я хачу ісьці туды, куды Ты ідзеш. Пакажы, калі ласка, як ставіць мэты так, як Ты жадаеш. Мне патрэбна Твая мудрасьць у плянаваньні і прызначэньні, каб я мог распараджацца тым, што Ты мне даў – сваім часам, грашыма, працай, адносінамі, здароўем – там, дзе я знаходжуся. Адкрый мне вочы на Тваю праўду і дапамажы ёй перайсьці ад маіх думак да майго сэрца і да маіх рук. У імя Ісуса Хрыста. Амэн!