Soma Biblia Kila Siku Oktoba/2022Mfano

Wakiyapukusa-pukusa mikononi mwao (m.1). Maana yake ni kwamba waliondoa punje zake kwa mikono. Leo twajifunza kuwa tusifungwe na amri za kibinadamu bali na amri za Mungu tu. Amri moja ya Mungu inasema: Siku ya saba ni sabato ya Bwana, Mungu wako; siku hiyo usifanye kazi yo yote (Kum 5:14). Viongozi wa dini ya Kiyahudi walikuwa wametafakari sana amri hii na kutengeneza orodha ndefu ya kazi zisizokuwa za halali kufanya siku hiyo. Mafarisayo walishika sana hayo. Kwa hiyo wanawauliza wanafunzi wa Yesu, Mbona mnafanya lisilo halali siku ya sabato? (m.2). Lakini Yesu aliwakemea. Akawaambia, Mwana wa Adamu ndiye Bwana wa sabato (m.5). Nawauliza ninyi, Je! Ni halali siku ya sabato kutenda mema, au kutenda mabaya; kuponya roho au kuangamiza? Akawakazia macho wote pande zote, akamwambia yule mtu, Nyosha mkono wako. Akaunyosha; mkono wake ukawa mzima tena (9-11). Sababu ya msingi ya Yesu kufanya hivyo ipo katika Mt 22:39-40 anaposema, Mpende Bwana Mungu wako kwa moyo wako wote, na kwa roho yako yote, na kwa akili zako zote. Hii ndiyo amri iliyo kuu, tena ni ya kwanza. Na ya pili yafanana nayo, nayo ni hii, Mpende jirani yako kama nafsi yako. Katika amri hizi mbili hutegemea torati yote na manabii.