Soma Biblia Kila Siku 10Mfano

Hapa tunaelezwa kuhusu ile imani iliyomfanya Ibrahimu ahesabiwe haki kwamba ilikuwa ya namna gani! Pia twaambiwa ni imani gani inayoweza kutufanya sisi tushinde kesi yetu katika hukumu ya Mungu! Imani ya Ibrahimu ilikuwa imani ya kuamini ahadi ya Mungu, yaani, ahadi yake ya kufanya jambo lisilowezekana kabisa kwa uwezo wa kibinadamu (m.18-22; zingatia kipekee kwamba Ibrahimu aliamini kwa kutarajia yasiyoweza kutarajiwa... huku akijua hakika ya kuwa Mungu aweza kufanya yale aliyoahidi. Kwa hiyo ilihesabiwa kwake kuwa ni haki)! Na imani inayotufanya sisi tuhesabiwe haki na Mungu ni imani inayoamini ahadi ya Mungu kuwa kwa kufa na kufufuka kwa Yesu Kristo dhambi zetu zimeondolewa na mauti imeshindwa. Tutahesabiwa vivyo hivyo, sisi tunaomwamini yeye aliyemfufua Yesu Bwana wetu katika wafu; ambaye alitolewa kwa ajili ya makosa yetu, na kufufuliwa ili mpate kuhesabiwa haki(m.24-25)!